നെബ്രാസ്കയില്‍ അഞ്ചും മൂന്നും വയസുള്ള കുട്ടികള്‍ മരിച്ച നിലയില്‍; പിതാവ് അറസ്റ്റില്‍

നെബ്രസ്ക്കാ: അഞ്ചും മൂന്നും വയസുള്ള കുട്ടികളെ വീടിനുള്ളില്‍ മരിച്ച നിലയില്‍ കണ്ടെത്തിയ സംഭവത്തില്‍ പിതാവിനെ പോലീസ് അറസ്റ്റ് ചെയ്തു. എമിലി , തിയോഡര്‍ എന്നീ കുട്ടികളുടെ മരണവുമായി ബന്ധപ്പെട്ട് അറസ്റ്റിലായ പിതാവ് ആഡം പ്രൈസിനെ (35) കലിഫോര്‍ണിയ കോടതിയില്‍ ഹാജരാക്കി. നെബ്രസ്ക്കാ ആല്‍ബര്‍ട്ട് അവന്യൂവിലുള്ള വീട്ടിലാണു കുട്ടികളെ മരിച്ചനിലയില്‍ കണ്ടെത്തിയത്.

ആഡം പ്രൈസും ഭാര്യയും തമ്മില്‍ വേര്‍പിരിയലിന്റെ നടപടിക്രമങ്ങള്‍ നടന്നു വരികയായിരുന്നു.കോടതി ഉത്തരവ് അനുസരിച്ചു പിതാവിനെ സന്ദര്‍ശിക്കാന്‍ വീട്ടിലെത്തിയതായിരുന്നു കുട്ടുകള്‍. ഇവരുടെ മാതാവ് ഇല്ലിനോയ്‌സിലാണു താമസം. കുട്ടികളെ ഫോണില്‍ ബന്ധപ്പെടാന്‍ സാധിക്കാതെ ഇരുന്നതിനെ തുടര്‍ന്ന് അമ്മ അഭ്യര്‍ഥിച്ചതിനെ തുടര്‍ന്നു പൊലീസ് എത്തിയപ്പോഴാണു മരിച്ചനിലയില്‍ കുട്ടികളെ കണ്ടെത്തിയത്.

ശനിയാഴ്ച വീട്ടില്‍ എത്തിയ പൊലീസ് അസ്വാഭാവികമായി ഒന്നും കാണാതിരുന്നതിനെ തുടര്‍ന്നു തിരിച്ചുപോയിരുന്നു. അമ്മ ആവശ്യപ്പെട്ടതനുസരിച്ച് ഞായറാഴ്ച പൊലീസ് വീണ്ടും പരിശോധനയ്ക്ക് എത്തിയപ്പോഴാണു കുട്ടികളെ മരിച്ചനിലയില്‍ വീടിനുള്ളില്‍ കണ്ടെത്തിയത്. തുടര്‍ന്നു നടത്തിയ അന്വേഷണത്തില്‍ അന്നേ ദിവസം വൈകിട്ട് ഏഴു മണിയോടെ ആഡം പ്രൈസിനെ കലിഫോര്‍ണിയയില്‍ നിന്നു പിടികൂടുകയായിരുന്നു.

കുട്ടികളുടെ മരണത്തെ കുറിച്ചുള്ള ഫോറന്‍സിക് റിപ്പോര്‍ട്ട് ലഭിച്ചതിനു ശേഷം പിതാവിനെതിരെ കൂടുതല്‍ കുറ്റകൃത്യം ചുമത്തണമെങ്കില്‍ അതു ചെയ്യുമെന്നു പൊലീസ് പറഞ്ഞു. പ്രതിയെ കലിഫോര്‍ണിയയില്‍ നിന്നു നെബ്രസ്‌ക്കോയിലേക്കു കൊണ്ടു വരുന്നതിനുള്ള നടപടികള്‍ ആരംഭിച്ചു.

by പി.പി. ചെറിയാന്‍