വീടിന്റെ കുളിമുറി ഭേദിച്ച് ഉള്ളിൽ കയറിയ ‘ഭീകരനെ’ കുടുക്കാൻ പോലീസിന്റെ സഹായം തേടി യുവതി.

വീടിന്റെ കുളിമുറി ഭേദിച്ച് ഉള്ളിൽ കയറിയ ‘ഭീകരനെ’ കുടുക്കാൻ പോലീസിന്റെ സഹായം തേടി യുവതി. കുളിമുറിക്കുള്ളിൽ അപ്രതീക്ഷിതമായി കടന്നെത്തിയ പാമ്പിനെ ഓടിക്കാനാണ് മറ്റു മാർഗങ്ങളില്ലാതെ യുവതി പോലീസ് സഹായം തേടിയത്. എന്നാൽ ഉള്ളിൽ കയറിയത് എന്തെന്ന് ഇവർ പോലീസിനുള്ള ഫോൺ കോളിൽ പറഞ്ഞിരുന്നില്ല.

സ്ഥലത്തെത്തിയ പോലീസ് ആദ്യം എന്ത് ചെയ്യുമെന്ന് അറിയാതെ കുഴങ്ങി. പാമ്പ് പിടിത്തക്കാരെയൊന്നും കിട്ടാത്ത സാഹചര്യത്തിൽ പോലീസ് തന്നെ ആ കർത്തവ്യം ഏറ്റെടുത്തു.
ബാത്റൂം സിങ്കിൽ ചുരുണ്ടിരുന്ന പാമ്പിനെ അടുത്ത പോലീസ് സ്റ്റേഷനിൽ നിന്നും മറ്റൊരു പോലീസുകാരനെ വരുത്തിയാണ് ഇവർ പുറത്താക്കിയത്.

കുടുങ്ങിയ ആൾ നിസ്സാരക്കാരനല്ല. എട്ടടി നീളമുള്ള മലമ്പാമ്പാണ് കുളിമുറിക്കുള്ളിൽ കയറിയത്. ഇംഗ്ലണ്ടിലെ മെർസിസൈഡ് പൊലീസാണ് ഈ അപൂർവ ഉദ്യമത്തിന് പിന്നിൽ. തങ്ങളുടെ ബ്ലോഗിൽ പോലീസ് ഈ ദൗത്യത്തെ പറ്റി കുറിപ്പെഴുതുകയും ഫേസ്ബുക്കിൽ ഫോട്ടോ പോസ്റ്റ് ചെയ്യുകയും ചെയ്‌തു. അടുത്ത് തന്നെയുള്ള വളർത്തു മൃഗങ്ങൾക്കുള്ള കേന്ദ്രത്തിൽ പാമ്പിനെ ഏൽപ്പിക്കുകയും ചെയ്‌തു.