കോവിഡ് മാനദണ്ഡങ്ങൾ ലംഘിച്ചും ഉടുപ്പ് ധരിക്കാതെയും രൂപമാറ്റം വരുത്തിയ ബൈക്കിൽ യാത്ര; ലൈസൻസും ഹെൽമറ്റും ഇല്ലാതെ ഒടുവിൽ പൊലീസ് കസ്റ്റഡിയിൽ

കൊച്ചി: ലൈസൻസില്ലാതെയും ഹെൽമറ്റും മാസ്കും ഉടുപ്പും ധരിക്കാതെയും നിയമങ്ങൾ കാറ്റിൽ പറത്തി രൂപമാറ്റം വരുത്തിയ ബൈക്കിൽ യാത്ര ചെയ്ത വീഡിയോ സമൂഹ മാധ്യമങ്ങളിൽ വൈറലായതോടെ യുവാവ് പൊലീസ് കസ്റ്റഡിയിലായി. ചെറായി സ്വദേശി റിച്ചൽ സെബാസ്റ്റ്യനാണ് പൊലീസ് പിടിയിലായത്. സമൂഹ മാധ്യമങ്ങളിൽ വൈറലാകാൻ വേണ്ടിയാണ് ഉടുപ്പില്ലാതെ ബൈക്കിൽ കറങ്ങിയതെന്നു യുവാവ് പൊലീസിനോടു സമ്മതിച്ചിട്ടുണ്ട്.

ഇയാളുടെ സുഹൃത്തുക്കൾ മറ്റൊരു ബൈക്കിൽ യാത്ര ചെയ്ത് ദൃശ്യങ്ങൾ പകർത്തുകയായിരുന്നു. അറസ്റ്റിലായ യുവാവിന്റെ സുഹൃത്തിന്റേതാണ് ബൈക്ക്. റിച്ചലിനെ സ്റ്റേഷൻ ജാമ്യത്തിൽ വിട്ടയച്ചെങ്കിലും ബൈക്ക് പൊലീസ് കസ്റ്റഡിയിലെടുത്തു. ഇത് കോടതിയിൽ ഹാജരാക്കുമെന്നു മുനമ്പം എസ്ഐ പറഞ്ഞു. ബൈക്ക് രൂപമാറ്റം വരുത്തിയതിന് ഇയാളുടെ സുഹൃത്തിനെതിരെയും നടപടിയുണ്ടാകും. മോട്ടര്‍ വാഹന വകുപ്പ് നിയമം, കോവിഡ് പ്രോട്ടോക്കോള്‍ ലംഘനം എന്നിവയുള്‍പ്പെടെ ആറ് വകുപ്പുകളാണ് ഇയാള്‍ക്കെതിരെ ചുമത്തിയിരിക്കുന്നത്. മോട്ടർ വെഹിക്കിൾ ഡിപാർട്മെന്റിനു വിവരം കൈമാറുമെന്നും പൊലീസ് പറഞ്ഞു.