ജയസൂര്യയുടെ ‘കത്തനാര്‍’ സിനിമയുടെ നിര്‍മാണം ഏറ്റെടുത്ത് ഗോകുലം ഗോപാലന്‍;

കൊച്ചി: കടമറ്റത്ത് കത്തനാര്‍ ആയി ജയസൂര്യ എത്തുന്ന ‘കത്തനാര്‍’ സിനിമയുടെ നിര്‍മാണം ഏറ്റെടുത്ത് ഗോകുലം ഗോപാലന്‍. ബിഗ് ബജറ്റ് ചിത്രമായ കടമറ്റത്ത് കത്തനാര്‍ 75 കോടി രൂപ മുതല്‍ മുടക്കിലാണ് നിര്‍മിക്കുന്നത്.

നേരത്തെ ചിത്രത്തിന്റെ ടീസര്‍ പുറത്തുവന്നിരുന്നു. മോഹന്‍ലാലും പൃഥ്വിരാജുമാണ് തങ്ങളുടെ ഫേസ്ബുക്ക് പേജുകള്‍ വഴി ടീസര്‍ പുറത്തുവിട്ടത്. മുമ്പ് വിജയ്ബാബു നിര്‍മ്മിക്കാനിരുന്ന ചിത്രത്തിന് 25 കോടിയായിരുന്നു ബഡ്ജറ്റ് കണ്ടത്.

എന്നാല്‍ 3ഡിയില്‍ ഒരുക്കുന്ന ചിത്രത്തിന്റെ ബഡ്ജറ്റ് വര്‍ധിക്കുമെന്ന് ഉറപ്പായതോടെ നിര്‍മ്മാണം ഗോകുലം ഗോപാലന്‍ ഏറ്റെടുക്കുകയായിരുന്നു.

ഫിലിപ്സ് ആന്‍ഡ് മങ്കിപെന്‍, ജോ ആന്‍ഡ് ദി ബോയ് എന്നീ ചിത്രങ്ങളുടെ സംവിധായകനായ റോജിന്‍ തോമസാണ് കത്തനാര്‍ ഒരുക്കുന്നത്. കഥ ആര്‍. രാമാനന്ദിന്റേതാണ്.

പ്രേതപിശാചുക്കളുമായി മാത്രമായിരിക്കില്ല പുതിയ കത്തനാരുടെ പോരാട്ടമെന്നാണ് ടീസര്‍ സൂചിപ്പിക്കുന്നത്. രാജാക്കന്മാരുമായി വരെ പോരിനിറങ്ങുന്ന കരിമ്പുലി കൂട്ടായുള്ള കത്തനാരാണ് പ്രേക്ഷകരെ കാത്തിരിക്കുന്നത്. ആരാണെന്ന് വെളിപ്പെടുത്താത്ത ഒരു സ്ത്രീശബ്ദമാണ് ടീസറില്‍ കത്തനാരെ വിവരിക്കുന്നത്. ഇവര്‍ തന്നെയായിരിക്കും പ്രധാന എതിരാളിയെന്നും ടീസറില്‍ പറഞ്ഞുവെക്കുന്നുണ്ട്.