ഇൻഡിഗോ കൊൽക്കത്ത-ദിയോഘർ വിമാന സർവീസ് ആരംഭിക്കുന്നു

ന്യൂഡൽഹി: കൊൽക്കത്ത-ദിയോഘർ വിമാന സർവീസ് ആരംഭിക്കുമെന്ന് അറിയിച്ച് ഇന്ത്യയിലെ മുൻനിര എയർലൈനായ ഇൻഡിഗോ. ശ്രാവണി മേളയ്ക്ക് മുന്നോടിയായാണ് കമ്പനിയുടെ അറിയിപ്പ്. 657 ഏക്കറിൽ, 401 കോടി രൂപ ചെലവിൽ നിർമിച്ച ദിയോഘർ വിമാനത്താവളത്തിന്റെ ഉദ്ഘാടനം പ്രധാനമന്ത്രി നരേന്ദ്ര മോദി നിർവഹിക്കാനിരിക്കെയാണ് ഈ നീക്കം. 

അടുത്ത ആഴ്ച മുതൽ ഉത്തരേന്ത്യയിൽ ശ്രാവണി മേളത്തിന് തുടക്കമാകും. ബാബ ബൈദ്യനാഥ് ക്ഷേത്രത്തിൽ ആദരാഞ്ജലികൾ അർപ്പിക്കാൻ ഈ സമയത്ത് രാജ്യത്തിന്റെ വിവിധ ഭാഗങ്ങളിൽ നിന്ന് ദിയോഘർ സന്ദർശിക്കാൻ നിരവധി ഭക്തരാണ് എത്തിച്ചേരുക. ഇത് മുന്നിൽ കണ്ടാണ് ഇൻഡിഗോ സർവീസുകൾ പ്രഖ്യാപിച്ചിരിക്കുന്നത്. 

എയർബസ് എ 320 വിമാനങ്ങളുടെ ലാൻഡിംഗും ടേക്ക് ഓഫും കൈകാര്യം ചെയ്യാൻ കഴിയുന്ന 2,500 മീറ്റർ നീളമുള്ള റൺവേയാണ് പുതിയ ദിയോഘർ വിമാനത്താവളത്തിന് ഉള്ളത്, കൂടാതെ 5,130 ചതുരശ്ര അടി ടെർമിനൽ കെട്ടിടവും ആറ് ചെക്ക്-ഇൻ കൗണ്ടറുകളും ഒരുക്കിയിട്ടുണ്ട്.

ആഴ്ചയിൽ നാല് ദിവസം ആയിരിക്കും കൊൽക്കത്ത-ദിയോഘർ സർവീസുകൾ ഉണ്ടാകുക.