പൊതുഗതാഗതം പൂര്‍ണമായും സൗജന്യമാക്കി യൂറോപ്പിലെ ഏറ്റവും ചെറു രാജ്യങ്ങളിലൊന്നായ ലക്‌സംബര്‍ഗ്

ലക്‌സംബര്‍ഗ് സിറ്റി: പൊതുഗതാഗതം പൂര്‍ണമായും സൗജന്യമാക്കി യൂറോപ്പിലെ ഏറ്റവും ചെറു രാജ്യങ്ങളിലൊന്നായ ലക്‌സംബര്‍ഗ്. കാറുകളുടെ എണ്ണം കുറച്ച് ഗതാഗതക്കുരുക്കും മലിനീകരണവും കുറയ്ക്കുകയാണ് പുതിയ പരിഷ്ക്കാരത്തിലൂടെ ലക്ഷ്യമിടുന്നത്. ഏറ്റവുമധികം ഗതാഗതക്കുരുക്കുള്ള രാജ്യ തലസ്ഥാനങ്ങളിലൊന്നാണ് ലക്‌സംബര്‍ഗ് സിറ്റി .

ചില നഗരങ്ങളില്‍ നിലവില്‍ സൗജന്യയാത്രയാണ്. ഇത് ശനിയാഴ്ച മുതല്‍ രാജ്യം മുഴുവന്‍ വ്യാപിപ്പിച്ചു. ലക്‌സംബര്‍ഗിലെ 40 % കുടുംബങ്ങള്‍ക്ക് ഇതിന്റെ പ്രയോജനം കിട്ടും. വര്‍ഷം 8000 രൂപയോളം (100 യൂറോ) ലാഭമുണ്ടാകും.

ലക്‌സംബര്‍ഗില്‍ 47% പേരും കാറോടിച്ചാണ് ജോലിക്കു പോകുന്നതെന്നാണ് കണക്ക്. ബസില്‍ യാത്ര ചെയ്യുന്നത് 32 % പേരും ട്രെയിനില്‍ പോകുന്നത് 19 % പേരും മാത്രം.

ഫ്രാന്‍സിന്റെ തലസ്ഥാനമായ പാരിസില്‍ 69 % പേര്‍ ഉപയോഗിക്കുന്നത് പൊതുഗതാഗത സംവിധാനമാണ്.