ചുമക്ക്‌ ഉടനടി ആശ്വാസം: ഇതാ ചില ഒറ്റമൂലികൾ

ചുമയ്‌ക്കുള്ള കാരണങ്ങൾ പലതാണ്. ചുമ പിടിപെടാൻ പ്രത്യേക സമയമൊന്നും വേണ്ട. പല തരത്തിലുള്ള അലർജി കൊണ്ടും കാലാവസ്ഥാവ്യതിയാനങ്ങൾ കൊണ്ടുമൊക്കെ ചുമ വരാം. ചുമ വന്നാൽ, ഇതിനുള്ള പരിഹാരങ്ങൾ നമ്മുടെ വീട്ടിൽ തന്നെയുണ്ട്.

ചെറിയ ഒരു ചുമ പോലും നമ്മളെ വല്ലാതെ അസ്വസ്ഥരാക്കാറുണ്ട്‌. കാലാവസ്ഥയില്‍ ഉണ്ടാകുന്ന മാറ്റം മാത്രമല്ല പലപ്പോഴും ചുമ വരാന്‍ കാരണം. കഫം അല്ലെങ്കില്‍ അസ്വസ്ഥ ഉണ്ടാക്കുന്ന അന്യ പദാര്‍ത്ഥങ്ങള്‍ തൊണ്ടയിലേക്ക്‌ ഒഴുകുമ്പോള്‍ ഉണ്ടാകുന്ന അനൈശ്ചിക പ്രവര്‍ത്തനമാണ്‌ ചുമ.

തൊണ്ടയ്ക്ക് ചൊറിച്ചില്‍ അനുഭവപ്പെട്ട്‌ തുടങ്ങുമ്പോള്‍ തന്നെ നമ്മള്‍ ചുമക്കുള്ള വീട്ടു മരുന്നുകള്‍ തേടാറുണ്ട്‌. അല്ലെങ്കില്‍ ചുമയുടെ ലക്ഷണങ്ങള്‍ക്ക്‌ പ്രതിവിധി കാണുന്നതിന്‌ പെട്ടെന്ന്‌ ആശ്വാസം നല്‍കുന്നതൊണ്ടയ്ക്ക് പരമ്പരാഗതമായുള്ള പ്രതിവിധികള്‍ തേടും. ശ്വാസ നാളം വൃത്തിയാക്കാനുള്ള ശ്രമത്തിലാണ്‌ നിങ്ങളുടെ ശരീരം എന്നതിന്റെ സൂചനയാണ്‌ ചുമ. ശ്വാസകോശത്തിലെ അമിത കഫമാണ്‌ മിക്കപ്പോഴും ചുമക്ക്‌ കാരണം, ഇത്‌ ശ്വാസകോശത്തിലെ ശ്ലേഷ്‌മപാളിയുടെ സങ്കോചത്തിനും അസ്വസ്ഥതക്കും കാരണമാകും എന്നാണ്‌ ആയുര്‍വേദത്തില്‍ പറയുന്നത്‌.

ഈ അവസ്ഥ കൈകാര്യം ചെയ്യുന്നതിനുള്ള ഒരു എളുപ്പ മാര്‍ഗം അമിതമായുള്ള കഫം അല്ലെങ്കില്‍ പിത്തം കുറയ്‌ക്കുക എന്നതാണ്‌. ചുമ ചികിത്സിച്ച്‌ ഭേദമാക്കുന്നതിന്‌ ആദ്യം വേണ്ടത്‌ ഇത്‌ വരണ്ട ചുമയാണോ അതോ കഫം ഉണ്ടാകുന്ന നനഞ്ഞ ചുമയാണോ എന്ന്‌ കണ്ടു പിടിക്കുകയാണ്‌.

തൊണ്ടയിലെ ചൊറിച്ചില്‍ മൂലവും ശ്വാസനാളത്തിലെ ജ്വലനം മൂലവും വരണ്ട ചുമ (dry cough) ഉണ്ടാകാം. അതേസമയം ശ്വാസ നാളത്തില്‍ കഫത്തിന്റെയും മറ്റ്‌ ദ്രവങ്ങളുടെയും സാന്നിദ്ധ്യമാണ്‌ നനവുള്ള ചുമക്ക്‌ (wet cough) കാരണം. സാധാരണ ഇത്‌ ന്യൂമോണിയ, ബ്രോക്കൈറ്റിസ്‌ , സൈനസൈറ്റിസ്‌, ക്ഷയം പോലുള്ള രോഗങ്ങളുടെ ലക്ഷണമാണ്‌. തുടര്‍ച്ചയായുള്ള ചുമ നെഞ്ച്‌ വേദനക്ക്‌ കാരണമാകാം.

എപ്പോഴും ശരീരത്തിലെ ജലാംശം നിലനിര്‍ത്താന്‍ ശ്രമിക്കുക. ശ്ലേഷ്‌മ പാളിയില്‍ ഈര്‍പ്പം നിലനില്‍ക്കാനും കഫം എളുപ്പത്തില്‍ പുറന്തള്ളാനും ഇത്‌ സഹായിക്കും.

ചുമക്ക്‌ ആശ്വാസം നല്‍കുന്ന 6 വീട്ടു മരുന്നുകള്‍:

വരണ്ട ചുമക്കും കഫത്തോടു കൂടിയ ചുമക്കും ഒരുപോലെ ആശ്വാസം ലഭിക്കാന്‍ ഈ വീട്ടുമരുന്നുകള്‍ പരീക്ഷിച്ചു നോക്കാം.

1. പാലും മഞ്ഞളും

തൊണ്ട തെളിയുന്നതിന്‌ ദിവസം രണ്ടു നേരം അര ടീസ്‌പൂണ്‍ മഞ്ഞള്‍പൊടി ചേര്‍ത്ത്‌ ഒരു ഗ്ലാസ്സ്‌ പാല്‍ കുടിക്കണം എന്നാണ്‌ ആയുര്‍വേദ വിദഗ്‌ധനായ ഡോ ബിഎന്‍ സിന്‍ഹ നിര്‍ദ്ദേശിക്കുന്നത്‌. കഠിനമായ ചുമ ഉണ്ടെങ്കില്‍ മേല്‍പറഞ്ഞ മിശ്രിതത്തിലേക്ക്‌ ഒരല്പം വെളുത്തുള്ളി കൂടി ചേര്‍ക്കാം. പാലില്‍ ഒരു വെളുത്തുള്ളി അല്ലി ഇട്ട്‌ തിളപ്പിച്ചതിന്‌ ശേഷം ഒരു നുള്ള്‌ മഞ്ഞള്‍ പൊടി ചേര്‍ക്കുക . ഈ പാനീയം ചുമക്ക്‌ വളരെ മികച്ച ഒരു മരുന്നാണ്‌. കാരണം തൊണ്ടക്ക്‌ ആശ്വാസം നല്‍കാന്‍ ഇത്‌ സഹായിക്കും. വെളുത്തുള്ളിക്ക്‌ പകരം ഇഞ്ചിയും ഉപയോഗിക്കാം രണ്ടും ഒരുപോലെ ഫലപ്രദമാണ്‌. ദിവസം പലപ്പോഴായി മഞ്ഞള്‍ വെള്ളം കവിള്‍ കൊള്ളുന്നത്‌ (gargle) തുടര്‍ച്ചയായ ചുമയ്‌ക്ക്‌ ആശ്വാസം നല്‍കും.

മഞ്ഞളില്‍ അടങ്ങിയിട്ടുള്ള കുർക്കുമിൻ എന്ന പദാർഥത്തിനു വൈറസിനെയും ബാക്ടീരിയയെയും പ്രതിരോധിക്കാനുള്ള ശേഷിയുണ്ട്‌. മാത്രമല്ല പ്രതിജ്വലന ശേഷിയുള്ളതിനാല്‍ അണുബാധ തടയാന്‍ സഹായിക്കും. ഇഞ്ചിയും വെളുത്തുള്ളിയും ടോണ്‍സില്‍സില്‍ തിങ്ങിനിറയുന്ന കഫം പുറത്തുപോകാന്‍ സഹായിക്കുകയും പ്രകൃതിദത്ത വേദനസംഹാരിയായി പ്രവര്‍ത്തിക്കുകയും ചെയ്യും. ഏത്‌ അസ്വസ്ഥതയും ഒഴിവാക്കുന്നതിനായി രാത്രി ഉറങ്ങുന്നതിന്‌ മുമ്പായി ഇത്‌ കുടിക്കുക. കൂടാതെ നെഞ്ചില്‍ നിന്നും കഫം മുകളിലേക്ക്‌ കൊണ്ടുവരാന്‍ ചൂട്‌ പാല്‍ സഹായിക്കും.

2. ചിറ്റമൃത്‌ നീര്‌

വിട്ടുമാറാത്ത ചുമ ഉണ്ടെങ്കില്‍ 2 ടേബിള്‍ സ്‌പൂണ്‍ ചിറ്റമൃത്‌ നീര്‌ വെള്ളത്തില്‍ ചേര്‍ത്ത്‌ ദിവസവും രാവിലെ കുടിക്കുന്നത്‌ വളരെ നല്ലതാണ്‌. ഇത്‌ രോഗപ്രതിരോധ ശേഷി ഉയര്‍ത്തുകയും വാതം, പിത്തം, കഫം എന്നീ മൂന്ന്‌ ദോഷങ്ങളെ സന്തുലിതമാക്കുകയും ചെയ്യും. അലര്‍ജിയെ പ്രതിരോധിക്കുന്നതിനുള്ള ഗുണങ്ങള്‍ ഉള്ളതിനാല്‍ പുക, മലിനീകരണം, പൂമ്പൊടി എന്നവയുടെ അലര്‍ജി മൂലം ഉണ്ടാകുന്ന ചുമ ഭേദമാക്കാന്‍ സഹായിക്കും.

3. തേന്‍ + ഇരട്ടി മധുരം+ കറുവപ്പട്ട

കാല്‍ ടീസ്‌പൂണ്‍ തേന്‍,കാല്‍ ടീസ്‌പൂണ്‍ ഇരട്ടി മധുരം പൊടി, കാല്‍ ടീസ്‌പൂണ്‍ കറുവപ്പട്ട എന്നിവയുടെ മിശ്രിതം വെള്ളത്തില്‍ ചേര്‍ത്ത്‌ എല്ലാ ദിവസവും രാവിലെയും വൈകിട്ടും കുടിച്ചാല്‍ മികച്ച ഫലം ലഭിക്കും.

തേനിന്‌ മികച്ച പ്രതിജ്വലന ഗുണങ്ങള്‍ ആണ്‌ ഉള്ളത്‌. കുറുപ്പടി ഇല്ലാതെ ലഭിക്കുന്ന ചുമ മരുന്നുകളേക്കാള്‍ ഫലപ്രദമാണ്‌ തേന്‍ എന്നാണ്‌ പെന്‍ സ്റ്റേറ്റ്‌ കോളേജ്‌ ഓഫ്‌ മെഡിസിന്‍ 2007ല്‍ നടത്തിയ പഠനത്തില്‍ കണ്ടെത്തിയത്‌. ഈ മരുന്നുകളില്‍ ചുമയെ അമര്‍ത്തി വെയ്‌ക്കുന്ന ഡെക്‌സ്‌ട്രോമെതോര്‍ഫാന്‍ പോലെയുള്ളവ അടങ്ങിയിരിക്കും.

4. കുരുമുളക്‌

*കഫത്തോടു കൂടിയ ചുമക്ക്‌ ശമനം കിട്ടാന്‍ സഹായിക്കുന്ന ഏറ്റവും ലളിതമായ വീട്ടു മരുന്നാണ്‌ കുരുമുളക്‌. അര ടീസ്‌പൂണ്‍ കുരുമുളക്‌ നെയ്യില്‍ ചേര്‍ത്ത്‌ ഭക്ഷണത്തിന്‌ ശേഷം കഴിക്കുക.*
*കുരുമുളകിന്റെ ഉഷ്‌ണ സ്വഭാവം കഫം നിറയുന്നത്‌ ഒഴിവാക്കാന്‍ സഹായിക്കും. മികച്ച ഫലം ലഭിക്കുന്നതിന്‌ ഈ മിശ്രിതം ദിവസം 2- 3 തവണ എങ്കിലും കഴിക്കുക.*

5. കുട്ടികള്‍ക്ക്‌ മാതളനാരങ്ങ നീര്‌

കുട്ടികള്‍ക്ക്‌ ഉണ്ടാകുന്ന ചുമയെ പ്രതിരോധിക്കാന്‍ സഹായിക്കുന്ന മികച്ച പ്രതിവിധികളില്‍ ഒന്നാണ്‌ ഇത്‌. അര കപ്പ്‌ മാതള നാരങ്ങ നീരില്‍ ഒരു നുള്ള്‌ ഇഞ്ചി പൊടിയും തിപ്പലി പൊടിയും ചേര്‍ത്ത്‌ കുട്ടികള്‍ക്ക്‌ നല്‍കുക.

തിപ്പലി പുനരുജ്ജീവന ശേഷിയുള്ള ഒരു ആയുര്‍വേദ ഒഷധമാണ്‌. മാതള നാരങ്ങ തൊണ്ടയ്‌ക്ക്‌ ആശ്വാസം നല്‍കും മാത്രമല്ല ഉഷ്‌ണ ഗുണമുള്ളതിനാല്‍ ഇഞ്ചിയും ഫലം നല്‍കും . രോഗപ്രതിരോധ ശേഷി ഉയര്‍ത്തുന്ന വിറ്റാമിന്‍ എ, സി എന്നിവയാല്‍ സമൃദ്ധമാണ്‌ മാതള നാരങ്ങ. ഇഞ്ചിക്ക്‌ പകരം കുരുമുളകും ഉപയോഗിക്കാം.

6. മസാല ചായ

ചുമയില്‍ നിന്നും സ്വാഭാവികമായി രക്ഷനേടാനുള്ള മികച്ച വഴികളില്‍ ഒന്നാണ്‌ ചൂടുള്ള മസാല ചായ ഒരു കപ്പ്‌ കുടിക്കുന്നത്‌. അര ടീസ്‌പൂണ്‍ ഇഞ്ചി പൊടി, ഒരു നുള്ള്‌ കറുവപ്പട്ട , കുറച്ച്‌ ഗ്രാമ്പു എന്നിവ ചേര്‍ത്ത്‌ ചായ ഉണ്ടാക്കി കുടിക്കുക. ഈ മൂന്ന്‌ സുഗന്ധ വ്യജ്ഞനങ്ങളും നിങ്ങളെ ഉള്ളില്‍ നിന്നും സുഖപ്പെടുത്താന്‍ മികച്ചതാണ്‌. ചൂട്‌ നല്‍കുന്ന ഈ സുഗന്ധവ്യജ്ഞനങ്ങള്‍ ശ്വാസകോശത്തില്‍ നിറഞ്ഞ കഫം സാവധാനം നീക്കം ചെയ്യുകയും മൂക്കൊലിപ്പ്‌ നിര്‍ത്താന്‍ സഹായിക്കുകയും ചെയ്യും.

ശ്രദ്ധിക്കേണ്ടത്:-

രാത്രിയില്‍ ഉറങ്ങുമ്പോള്‍ ചുമ കൂടാനുള്ള പ്രവണത ഉണ്ടാകും. നിങ്ങള്‍ കിടക്കുമ്പോള്‍ കഫം മൂക്കില്‍ നിന്നും തൊണ്ടയിലേക്ക്‌ ഒഴുകി എത്തുന്നതു കൊണ്ടാണ്‌ ഇങ്ങനെ സംഭവിക്കുന്നത്‌. തല ഉയര്‍ത്തി വെച്ചു കിടക്കുന്നതിലൂടെ ഇതിന്‌ പരിഹാരം കാണാന്‍ കഴിയും. ഇത്‌ ചുമ കുറയ്‌ക്കുകയും നന്നായി ഉറക്കം ലഭിക്കാൻ സഹായിക്കുകയും ചെയ്യും.