കാർ ഇൻഷുറൻസിന് അമിത തുക നൽകുന്നുണ്ടോ? €300 വരെ ലാഭിക്കാൻ വഴിയുണ്ട്!

അയർലണ്ടിലെ വാഹന ഉടമകൾക്ക് കാർ ഇൻഷുറൻസ് പ്രീമിയത്തിൽ ഏകദേശം €300 വരെ ലാഭിക്കാൻ അവസരമുണ്ടെന്ന് സെൻട്രൽ ബാങ്ക് ഓഫ് അയർലണ്ടിന്റെ പുതിയ പഠനം. വിവിധ ഇൻഷുറൻസ് കമ്പനികളിൽ നിന്ന് ലഭിക്കുന്ന ക്വട്ടേഷനുകൾ താരതമ്യം ചെയ്യുന്നതിലൂടെ ഒരേ വാഹനത്തിനും ഒരേ ഡ്രൈവർ പ്രൊഫൈലിനും വ്യത്യസ്ത നിരക്കുകൾ കണ്ടെത്താനാകുമെന്ന് പഠനം വ്യക്തമാക്കുന്നു.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

2026 നവംബർ 13-ന് പുറത്തുവിട്ട പഠനത്തിൽ എട്ട് പ്രമുഖ ഇൻഷുറൻസ് കമ്പനികളിൽ നിന്നുള്ള ക്വട്ടേഷനുകളാണ് പരിശോധിച്ചത്. 16 വ്യത്യസ്ത ഉപഭോക്തൃ പ്രൊഫൈലുകൾ അടിസ്ഥാനമാക്കിയായിരുന്നു വിശകലനം. അയർലണ്ടിലെ സ്വകാര്യ വാഹന ഇൻഷുറൻസ് വിപണിയുടെ 90 ശതമാനത്തിലധികം ഈ കമ്പനികളാണ് കൈകാര്യം ചെയ്യുന്നത്.

ഒരേ ഡ്രൈവിങ് പരിചയവും ഒരേ വാഹനവുമുള്ള വ്യക്തികൾക്ക് പോലും ഇൻഷുറൻസ് കമ്പനികൾ നൽകുന്ന പ്രീമിയത്തിൽ കാര്യമായ വ്യത്യാസമുണ്ടാകാമെന്നാണ് കണ്ടെത്തൽ. ഒന്നിലധികം കമ്പനികളിൽ നിന്ന് ക്വട്ടേഷൻ തേടിയാൽ ഏകദേശം €300 വരെ ലാഭിക്കാനാകും. സെൻട്രൽ ബാങ്കിന്റെ കണക്കുകൾ പ്രകാരം അയർലണ്ടിൽ സ്വകാര്യ വാഹന ഇൻഷുറൻസിന്റെ ശരാശരി വാർഷിക പ്രീമിയം ഏകദേശം €655 ആണ്.

എന്നാൽ ഭൂരിഭാഗം വാഹന ഉടമകളും ഇൻഷുറൻസ് പുതുക്കുമ്പോൾ നിലവിലുള്ള കമ്പനിയെ തന്നെ ആശ്രയിക്കുകയാണ് ചെയ്യുന്നത്. വെറും 9 ശതമാനം വാഹന ഉടമകൾ മാത്രമാണ് ഇൻഷുറൻസ് പുതുക്കുന്ന സമയത്ത് കമ്പനി മാറുന്നത്. അഞ്ചിൽ ഒരാൾ ഇൻഷുറൻസ് കമ്പനിയെ ബന്ധപ്പെടുകയോ മറ്റ് നിരക്കുകൾ പരിശോധിക്കുകയോ ചെയ്യാതെ പോളിസി പുതുക്കുന്നതായും പഠനം കണ്ടെത്തി.

കൂടുതൽ റിസ്കുള്ള ഡ്രൈവർമാർക്ക് ഇൻഷുറൻസ് നിരക്കിൽ വലിയ വ്യത്യാസങ്ങൾ ഉണ്ടാകാമെന്നും പഠനം ചൂണ്ടിക്കാട്ടുന്നു. കുറഞ്ഞ ഡ്രൈവിങ് പരിചയമുള്ളവർ, പെനാൽറ്റി പോയിന്റുകളുള്ളവർ, വാഹനങ്ങൾ ബിസിനസ് ആവശ്യങ്ങൾക്കായി ഉപയോഗിക്കുന്നവർ എന്നിവർക്ക് ഓൺലൈനിൽ ഇൻഷുറൻസ് ക്വട്ടേഷൻ ലഭിക്കണമെന്നില്ല. ഇത്തരം സാഹചര്യങ്ങളിൽ ഇൻഷുറൻസ് ബ്രോക്കർമാരെ സമീപിക്കുകയോ കമ്പനികളെ നേരിട്ട് ബന്ധപ്പെടുകയോ ചെയ്യണമെന്ന് സെൻട്രൽ ബാങ്ക് നിർദേശിക്കുന്നു.

ഇൻഷുറൻസ് പുതുക്കുന്നതിന് മുമ്പ് ഓരോ വർഷവും വിവിധ കമ്പനികളുടെ നിരക്കുകൾ പരിശോധിക്കണം. സുരക്ഷിതമായി വാഹനമോടിക്കുക, പെനാൽറ്റി പോയിന്റുകൾ ഒഴിവാക്കുക, ക്ലെയിമുകളില്ലാത്ത ഡ്രൈവിങ് ചരിത്രം നിലനിർത്തുക തുടങ്ങിയ കാര്യങ്ങളും പ്രീമിയം കുറയ്ക്കാൻ സഹായിക്കും. പ്രതിവർഷം ഒരുമിച്ച് പ്രീമിയം അടയ്ക്കുന്നതും ലഭ്യമായ ഡിസ്കൗണ്ടുകൾ പ്രയോജനപ്പെടുത്തുന്നതും പരിഗണിക്കാവുന്നതാണ്.

വില മാത്രം നോക്കി ഇൻഷുറൻസ് തിരഞ്ഞെടുക്കരുതെന്നും പോളിസിയിൽ ഉൾപ്പെടുന്ന പരിരക്ഷകൾ, അധിക ചാർജുകൾ (Excess), മറ്റ് ആനുകൂല്യങ്ങൾ എന്നിവയും താരതമ്യം ചെയ്യണമെന്നും സെൻട്രൽ ബാങ്ക് ഇൻഷുറൻസ് വിഭാഗം ഡയറക്ടർ സീന കന്നിങ്ഹാം വ്യക്തമാക്കി.

അതേസമയം, ഇൻഷുറൻസ് കമ്പനികൾ മാറുന്നത് മാത്രമല്ല നിരക്കുകൾ താരതമ്യം ചെയ്യുന്നതിന്റെ ലക്ഷ്യമെന്നും നിലവിലുള്ള കമ്പനിയിൽ തന്നെ കുറഞ്ഞ നിരക്കോ കൂടുതൽ അനുയോജ്യമായ പരിരക്ഷയോ ലഭിക്കാനുള്ള സാധ്യത പരിശോധിക്കണമെന്നും ഇൻഷുറൻസ് അയർലണ്ട് ചീഫ് എക്സിക്യൂട്ടീവ് മോയാഗ് മർഡോക്ക് പറഞ്ഞു. ഇൻഷുറൻസ് പുതുക്കുന്ന സമയത്ത് ലഭിക്കുന്ന ആദ്യ ക്വട്ടേഷൻ അംഗീകരിക്കുന്നതിന് പകരം മറ്റ് കമ്പനികളുടെ നിരക്കുകളും പരിശോധിക്കുന്നത് അയർലണ്ടിലെ വാഹന ഉടമകൾക്ക് സാമ്പത്തികമായി വലിയ ആശ്വാസമാകുമെന്നാണ് പുതിയ പഠനം നൽകുന്ന പ്രധാന സന്ദേശം.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==