നിക്ഷേപകരെ ആകർഷിക്കുന്ന രീതിയിലേക്ക് മാറിയില്ലെങ്കിൽ കേരളത്തെ കാത്തിരിക്കുന്നത് വൻദുരന്തം: സാബു എം.ജേക്കബ്

കൊച്ചി: നിക്ഷേപങ്ങളെ ആകർഷിക്കാൻ ഓരോ സംസ്ഥാനങ്ങളും പരസ്പരം മത്സരിക്കുന്ന കാലഘട്ടത്തിൽ കേരളം ഇപ്പോഴും 50 വർഷത്തോളം പുറകിലാണെന്നു തെലങ്കാന സന്ദർശനത്തിലൂടെ ബോധ്യപ്പെട്ടതായും നിക്ഷേപകരെ ആകർഷിക്കുന്ന രീതിയിലേക്ക് മാറിയില്ലെങ്കിൽ വലിയ ദുരന്തമാകും സംസ്ഥാനത്തിനു സംഭവിക്കുകയെന്നും കിറ്റെക്സ് എംഡി സാബു എം.ജേക്കബ്. നാടിന്റെ വളർച്ചയും തൊഴിൽ അവസരവും ഉറപ്പാക്കാൻ കഠിനാധ്വാനം ചെയ്യുന്ന രാഷ്ട്രീയ ഉദ്യോഗസ്ഥ നേതൃത്വമാണ് തെലങ്കാനയിലേതെന്നും തെലങ്കാന സന്ദർശനത്തിലൂടെ വ്യവസായി എന്ന നിലയിൽ ലഭിച്ചത് വലിയ ആത്മവിശ്വാസമാണെന്നും സാബു എം.ജേക്കബ് കൂട്ടിച്ചേർത്തു.

തെലങ്കാന സര്‍ക്കാരുമായി നടത്തിയ കൂടിക്കാഴ്ചയുടെ വിശദാംശങ്ങള്‍ പുറത്തുവിട്ടുകൊണ്ടാണ് സാബു ജേക്കബ് കേരള സര്‍ക്കാരിനെതിരെ ആഞ്ഞടിച്ചത്. ഇനിയുള്ള നിക്ഷേപങ്ങളെല്ലാം തെലങ്കാനയിലായിരിക്കുമെന്നും കൊച്ചിയില്‍ വിളിച്ചു ചേര്‍ത്ത വാര്‍ത്താ സമ്മേളനത്തില്‍ സാബു ജേക്കബ് വ്യക്തമാക്കി.