മാധ്യമ പ്രവർത്തകൻ നികേഷ് കുമാറിൻറെ ഭാര്യയ്ക്കും കുഞ്ഞിനും നേരെ വധശ്രമം

കൊച്ചി: പ്രശസ്ത മാധ്യമ പ്രവർത്തകൻ നികേഷ് കുമാറിൻറെ ഭാര്യയ്ക്കും കുഞ്ഞിനും നേരെ വധശ്രമം. കഴിഞ്ഞ ദുഃഖവെള്ളി ദിവസം വെളുപ്പിനെ കൊച്ചിയിലെ കാക്കനാടുള്ള അമ്മയുടെ ഫ്ലാറ്റിൽ നിന്നും നടന്നു പള്ളിയിലേക്ക് പോകുന്ന വഴി ഒരു വാൻ ഇരുവർക്കും നേരെ പാഞ്ഞു വരുകയായിരുന്നു. എന്നാൽ നിയന്ത്രണം തെറ്റി അബദ്ധവശാൽ വാഹനം ഇരുവർക്കും നേരെ വന്നതാണെന്ന് കരുതി ഇവർ മുന്നോട്ടു പോവുകയായിരുന്നു. എന്നാൽ അതേ വാഹനം വീണ്ടും ഇരുവർക്കും നേരെ പാഞ്ഞുവന്നതിനെ തുടർന്നാണ് ഒരു വധശ്രമമാണ് നടന്നതെന്ന നിഗമനത്തിയത്. നികേഷ് കുമാറിൽ നിന്നും വിവരം സ്ഥിരീകരിച്ചതായി ഉദ്ധരിച്ചുകൊണ്ട് പ്രമുഖ മലയാളം ഓൺലൈൻ മാധ്യമമായ മറുനാടൻ മലയാളിയാണ് ഈ വാർത്ത പുറത്തുവിട്ടത്.

കേരളത്തിലെ അറിയപ്പെടുന്ന ഒരു മാധ്യമ പ്രവർത്തകയാണ് നികേഷ് കുമാറിന്റെ ഭാര്യയായ വീണ. വീണ സുഹൃത്തുക്കളോട് ഈ വിവരം സൂചിപ്പിച്ചതിനെ തുടർന്നനാണ് വധശ്രമം നടന്ന വിവരം കൂടുതൽപ്പേർ അറിഞ്ഞത്. അടുത്തിടെ നടിയെ ആക്രമിച്ച കേസിൽ നടിയ്ക്കനുകൂലമായി വാർത്തകൾ നൽകിയതിന് നികേഷ് കുമാറിന്റെ ഉടമസ്ഥതയിലുള്ള ചാനലിനെതിരെ പ്രതി ഭാഗം പരാതി നൽകിയിരുന്നു.

അതേസമയം വധശ്രമവുമായി ബന്ധപ്പെട്ട് നികേഷും കുടുംബവും പൊലീസിൽ പരാതിപ്പെട്ടിട്ടില്ല. എന്നാൽ മറുനാടൻ മലയാളിയുടെ മാധ്യമ പ്രവർത്തകനായ സാജൻ സ്കറിയ ഇക്കാര്യം പൊലീസിനെ അറിയിച്ചിട്ടുണ്ട്.