ക്രിപ്​റ്റോകറൻസി വ്യാപാരത്തിന് ഏർപ്പെടുത്തിയ നിരോധനം സുപ്രീംകോടതി നീക്കി

ന്യൂഡൽഹി: ക്രിപ്​റ്റോകറൻസി വ്യാപാരത്തിന്​ 2018ൽ ആർ.ബി.ഐ ഏർപ്പെടുത്തിയ നിരോധനം സുപ്രീംകോടതി നീക്കി. ഇതോടെ ബിറ്റ്​കോയിൻ ഉൾപ്പടെയുള്ള ഡിജിറ്റൽ കറൻസികൾ ഇന്ത്യയിൽ നിയമവിധേയമാകും. സുപ്രീംകോടതിയുടെ മൂന്നംഗ ബെഞ്ചാണ്​ നിർണായക ഉത്തരവ്​ പുറപ്പെടുവിച്ചത്​.​

ക്രിപ്​റ്റോകറൻസിക്ക്​ സമ്പൂർണ്ണ നിരോധനമെന്നത്​ നിയമപരമായി ശരിയല്ലെന്ന്​ സുപ്രീംകോടതി നിരീക്ഷിച്ചു. ഇത്തരം കറൻസിയുടെ വ്യാപാരത്തിനായി നിയമപരമായ ഒരു ചട്ടക്കൂട്​ ഉണ്ടാക്കുകയാണ്​ വേണ്ടതെന്നും സുപ്രീംകോടതി ഉത്തരവിൽ വ്യക്​തമാക്കുന്നു. ഡിജിറ്റൽ കറൻസിയുടെ ഇടപാടുമായി ബന്ധപ്പെട്ട്​ നിരവധി ഹരജികൾ സുപ്രീംകോടതിയുടെ പരിഗണനയിലുണ്ട്​. കോടതിയുടെ ഇന്നത്തെ ഉത്തരവ്​ ഈ ഹരജികളെയെല്ലാം സ്വാധീനിക്കും.​

ക്രിപ്​റ്റോകറൻസിക്ക്​ നിരോധനമേർപ്പെടുത്തിയ ആർ.ബി.ഐ ഉത്തരവിനെതിരെ ഇൻറർനെറ്റ്​ ആൻഡ്​ മൊബൈൽ അസോസിയേഷൻ ഓഫ്​ ഇന്ത്യയാണ്​ സുപ്രീംകോടതിയെ സമീപിച്ചത്​. അതേസമയം, ആർ.ബി.ഐയുടെ കീഴിൽ വരുന്ന സ്ഥാപനങ്ങൾ ക്രിപ്​റ്റോ കറൻസി ഉപയോഗിക്കുന്നതിന്​ മാത്രമാണ്​ നിരോധനം ഏർപ്പെടുത്തിയതെന്ന്​ കേന്ദ്രബാങ്ക്​ പ്രതികരിച്ചു. തീവ്രവാദ പ്രവർത്തനങ്ങൾക്കും കള്ളപ്പണം വെളുപ്പിക്കാനും ക്രിപ്​റ്റോകറൻസി ഉപയോഗിക്കുന്നുണ്ടെന്നും ആർ.ബി.ഐ ആരോപിച്ചു.