ഓണ്‍ലൈന്‍ ഫുഡ് ബിസിനസിലേക്ക് ഗൂഗിള്‍

ഗൂഗിള്‍ സേര്‍ച്ച് എഞ്ചിനിലൂടെ നേരിട്ട് ഓണ്‍ലൈനായി ഭക്ഷണം ബുക്ക് ചെയ്യാനുള്ള സംവിധാനം ഇന്ത്യയില്‍ വൈകാതെ നിലവില്‍ വരുമെന്നു റിപ്പോര്‍ട്ട്. റെസ്റ്റോറന്റുകള്‍ തിരയാനും കണ്ടെത്താനും ഓര്‍ഡറുകള്‍ നല്‍കാനും പേയ്മെന്റുകള്‍ നടത്താനും ഈ പ്രക്രിയ ഉപയോക്താക്കളെ അനുവദിക്കും. ഗൂഗിളിന്റെ പിന്തുണയുള്ള ഡന്‍സോ പോലുള്ള മൂന്നാം കക്ഷികളാകും ഭക്ഷണം വിതരണം ചെയ്യുന്നത്.

ഇന്ത്യയില്‍ ഓണ്‍ലൈന്‍ ഭക്ഷണ വിതരണ സേവനം പരീക്ഷിക്കാന്‍ ഗൂഗിള്‍ തയ്യാറെടുക്കുന്നതായുള്ള സൂചന നേരത്തെ ഉണ്ടായിരുന്നു. രണ്ട് മാസം മുമ്പ് പ്രമുഖ ഇ-കൊമേഴ്സ് കമ്പനിയായ ആമസോണ്‍ ഇന്ത്യയില്‍ ഓണ്‍ലൈന്‍ ഭക്ഷ്യ വിതരണ സേവനം ആരംഭിക്കുമെന്ന് പ്രഖ്യാപിച്ച ശേഷമാണ് യുഎസ് ആസ്ഥാനമായുള്ള ടെക്നോളജി ഭീമന്‍ നീക്കത്തിന് വേഗത കൂടിയത്.ഗൂഗിള്‍  നിര്‍ദ്ദേശിച്ച പ്രകാരം ഹോട്ടലുകളുടെ മെനു, വില വിവരം എന്നിവ ഉള്‍ക്കൊള്ളിച്ച് തങ്ങളുടെ സംവിധാനം പരിഷ്‌കരിക്കാന്‍ ഡന്‍സോ ശ്രമം തുടങ്ങിയിട്ടുണ്ട്. ഓര്‍ഡര്‍ഫുഡ് ഡോട്ട് ഗൂഗിള്‍ ഡോട്ട് കോം എന്ന സംവിധാനത്തിലൂടെ  അമേരിക്കയില്‍ ഈ സേവനം ഇപ്പോള്‍ തന്നെ ലഭ്യമാണ്.

വിപണിയില്‍ വലിയ മാറ്റങ്ങളുണ്ടാക്കും ഗൂഗിളിന്റെ രംഗപ്രവേശമെന്ന നിരീക്ഷകര്‍ വിലയിരുത്തുന്നു. സ്വിഗിയും സൊമാറ്റോയും പോലുള്ള കമ്പനികള്‍ക്ക് കടുത്ത മത്സരം അഭിമുഖീകരിക്കേണ്ടി വരും. ഇന്ത്യയിലെ ഭക്ഷ്യ വിതരണ വ്യവസായത്തില്‍ പ്രധാനമായും ആധിപത്യം പുലര്‍ത്തുന്നത് സൊമാറ്റോയുടെയും സ്വിഗ്ഗിയുടെയും ആപ്ലിക്കേഷന്‍ അധിഷ്ഠിത സേവനങ്ങളാണ്. രണ്ട് കമ്പനികളും സംയുക്തമായി രാജ്യത്തെ വിപണി വിഹിതത്തിന്റെ 90% കൈവശം വച്ചിട്ടുണ്ട്.