ദല്‍ഹിയിലെ തുഗ്ലക്കാബാദിലെ ചേരിപ്രദേശത്ത് വന്‍ തീപിടുത്തം; 15,00 ഓളം വീടുകള്‍ കത്തിനശിച്ചു

ന്യൂദല്‍ഹി: ദല്‍ഹിയിലെ തുഗ്ലക്കാബാദിലെ ചേരിപ്രദേശത്ത് വന്‍ തീപിടുത്തം. 15,00 ഓളം വീടുകള്‍ കത്തിനശിച്ചു.

തിങ്കളാഴ്ച രാത്രിയിലാണ് തീപിടുത്തമുണ്ടായത്. അര്‍ധരാത്രിയോടെയാണ് ഫയര്‍ഫോഴ്‌സിന് അറിയിപ്പു ലഭിക്കുന്നതെന്ന് അധികൃതര്‍ വ്യക്തമാക്കി.

പൊലീസും ഫയര്‍ഫോഴ്‌സും ചേര്‍ന്ന് പ്രദേശവാസികളെ ഒഴിപ്പിച്ചു. പലരും ഉറക്കമായിരുന്നെന്നും തീപിടുത്തമുണ്ടായത് അറിഞ്ഞിരുന്നില്ലെന്നും പൊലീസ് പറഞ്ഞു.

‘ഏകദേശം ഒരു മണിയോടെയാണ് ഞങ്ങള്‍ക്ക് വിവരം ലഭിക്കുന്നത്. ഉടന്‍ തന്നെ ഞങ്ങള്‍ സ്ഥലത്തെത്തുകയും ചെയ്തു. 1000 മുതല്‍ 1200 ഓളം വീടുകള്‍ പൂര്‍ണമായും കത്തിനശിച്ചിട്ടുണ്ട്,’ ദല്‍ഹിയിലെ സൗത്ത് ഈസ്റ്റ് ഡി.സി.പി രാജേന്ദ്ര പ്രസാദ് മീന പറഞ്ഞു.

ഇന്ന് പുലര്‍ച്ചെ 3.40ഓടെയാണ് തീയണച്ചത്. എന്നാല്‍ 1500ഓളം വരുന്ന വീടുകള്‍ കത്തിനശിച്ചതിനാല്‍ നിരവധി വരുന്ന കുടുംബങ്ങളാണ് തെരുവിലായത്. സര്‍ക്കാര്‍ നാശനഷ്ടത്തിന്റെ കണക്കെടുത്തുകൊണ്ടിരിക്കുകയാണ്.

‘തീപിടുത്തമുണ്ടായതോടെ ആളുകള്‍ വീടുകളില്‍ നിന്നും ഇറങ്ങിയോടുകയായിരുന്നു. തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല. അതേസമയം ആളപായങ്ങളൊന്നും ഇതുവരെ റിപ്പോര്‍ട്ു ചെയ്തിട്ടില്ല,’ രാജേന്ദ്ര പ്രസാദ് മീന പറഞ്ഞു.