പൊലീസ് വെടിവെപ്പില്‍ വികാസ് ദുബെ കൊല്ലപ്പെട്ട സംഭവത്തില്‍ പ്രതികരണവുമായി ഭാര്യ

ലഖ്‌നൗ: പൊലീസ് വെടിവെപ്പില്‍ വികാസ് ദുബെ കൊല്ലപ്പെട്ട സംഭവത്തില്‍ പ്രതികരണവുമായി ഭാര്യ. തന്റെ ഭര്‍ത്താവ് തെറ്റ് ചെയ്‌തെന്നും അദ്ദേഹം ഇത്തരമൊരു വിധിക്ക് അര്‍ഹനയായിരുന്നുവെന്നുമാണ് ഭാര്യ റിച്ച പ്രതികരിച്ചത്. ദുബെയുടെ സംസ്‌ക്കാര ചടങ്ങുകളില്‍ പങ്കെടുത്ത് മടങ്ങവേയായിരുന്നു അവര്‍ മാധ്യമങ്ങളോട് പ്രതികരിച്ചത്.

കനത്ത സുരക്ഷയിലാണ് ദുബെയുടെ സംസ്‌ക്കാര ചടങ്ങുകള്‍ നടത്തിയത്. ദുബെയുടെ മകനും ഭാര്യയും സഹോദര പുത്രനുമായിരുന്നു സംസ്‌ക്കാര ചടങ്ങുകളില്‍ പങ്കെടുക്കാനായി എത്തിയത്.

ദുബെയുടെ മരണത്തെ കുറിച്ച് എന്താണ് പറയാനുള്ളത് എന്ന ചോദ്യത്തിന് അദ്ദേഹം ഇത് അര്‍ഹിക്കുന്നു എന്നായിരുന്നു റിച്ചയുടെ മറുപടി. ദുബെ തെറ്റ് ചെയ്‌തെന്നാണ് നിങ്ങളും പറയുന്നത്, അല്ലേ, എന്ന ചോദ്യത്തിന് അതെ അതെ അദ്ദേഹം നിരവധി തെറ്റുകള്‍ ചെയ്തു എന്നായിരുന്നു റിച്ച മറുപടി നല്‍കിയത്. മാധ്യമ പ്രവര്‍ത്തകര്‍ ചോദ്യങ്ങള്‍ ആവര്‍ത്തിച്ചപ്പോള്‍ തനിക്ക് കൂടുതല്‍ ഒന്നും പറയാനില്ലെന്നും മാധ്യമപ്രവര്‍ത്തകര്‍ ഇവിടെ നിന്നും പോകണമെന്നുമായിരുന്നു അവര്‍ പറഞ്ഞത്. ദുബെയെ വെടിവെച്ച് കൊന്നതില്‍ മാധ്യമങ്ങള്‍ക്കും പങ്കുണ്ടെന്നും ഇതിനിടെ പറയുന്നുണ്ടായിരുന്നു.

ഉത്തര്‍പ്രദേശ് ഭരണകൂടം ചെയതത് ശരിയായ കാര്യമാണെന്നായിരുന്നു വികാസ് ദുബെയുടെ കൊലപാതകത്തില്‍ അച്ഛന്‍ രാം കുമാര്‍ ദുബെ പ്രതികരിച്ചത്. എട്ട് പൊലീസുകാരെ കൊലപ്പെടുത്തിയ തന്റെ മകന്‍ ചെയ്തത് പൊറുക്കാന്‍ കഴിയാത്ത പാപമാണെന്നും രാംകുമാര്‍ പറഞ്ഞിരുന്നു.