ഭാരത് ജോഡോ യാത്ര സമാധാനപരമായി കടന്നു പോവുന്നുവെന്ന് സർക്കാർ; ഗതാഗത തടസ്സമെന്ന ഹർജി തള്ളി

കൊച്ചി: രാഹുൽഗാന്ധി നയിക്കുന്ന കോൺഗ്രസിന്റെ ഭാരത് ജോഡോ യാത്ര സമാധാനപരമായിട്ടാണ് കടന്ന് പോവുന്നതെന്ന് സംസ്ഥാന സർക്കാർ ഹൈക്കോടതിയിൽ. യാത്ര ഗതാഗത തടസ്സമുണ്ടാക്കുന്നുവെന്ന സ്വകാര്യ ഹർജി പരിഗണിക്കവേയാണ് സർക്കാർ ഇക്കാര്യം കോടതിയെ അറിയിച്ചത്. യാത്ര ഗതാഗത തടസ്സമുണ്ടാക്കുന്നുവെന്ന പരാതിയിൽ ഹർജിക്കാരന് ഇതിനെ സാധൂകരിക്കുന്ന ഒരു തെളിവും ഹാജരാക്കാനായില്ലെന്ന് ചൂണ്ടിക്കാട്ടി കോടതി ഹർജി തള്ളുകയും ചെയ്തു.

ജോഡോ യാത്ര എറണാകുളം ജില്ലയിൽ പ്രവേശിച്ച ഉടനെ ആയിരുന്നു ഗതാഗത തടസ്സമുണ്ടാക്കുന്നുവെന്ന് ചൂണ്ടിക്കാട്ടി ഹൈക്കോടതിയിൽ സ്വകാര്യ ഹർജിയെത്തിയത്. എന്നാൽ അന്ന് ഹർജി പരിഗണിക്കാനായില്ല. തുടർന്ന് കൂടുതൽ വിശദാശങ്ങൾ വ്യക്തമാക്കാൻ ഹർജിക്കാരനോട് കോടതി ആവശ്യപ്പെടുകയായിരുന്നു.

ഇതിന് ശേഷമാണ് ഇന്ന് ഹർജി പരിഗണിക്കുകയും തള്ളുകയും ചെയ്തത്. യാത്രയിൽ നിയമലംഘനമുണ്ടായ ഇടത്തെല്ലാം കേസെടുത്തിട്ടുണ്ടെന്നും തുടർ നടപടികൾ ഉണ്ടാവുമെന്നും സർക്കാർ അറിയിച്ചു.