മരുഭൂമിയില്‍ മാത്രം കണ്ടുവരുന്ന കുരുവി തൃശ്ശൂര്‍-ചാവക്കാടില്‍ വിരുന്നിനെത്തി

ചാവക്കാട്: ചാരനികത്തില്‍ കുഞ്ഞുകണ്ണുകളും ചിറകിന് കീഴ്ഭാഗം തൂവെള്ള നിറത്തില്‍ കുഞ്ഞുകാലുകളും വാലിന്റെ അറ്റത്തായി ചാരനിറത്തിലുള്ള ഷേയ്ഡ് പോലുള്ള ചാരത്തൂവലുകളുമായി ഒരു കുഞ്ഞു സുന്ദരി കുരുവി ചാവക്കാട് എത്തി. വിരുന്നുവന്ന ഈ കുഞ്ഞന്‍ കുരുവി അഫ്ഗാനിസ്ഥാന്‍, ഈജിപ്ത്, ഇറാന്‍, കസാക്കിസ്ഥാന്‍, ലെബനന്‍, നേപ്പാള്‍, ഒമാന്‍, പാകിസ്താന്‍, റഷ്യന്‍, താജിക്കിസ്ഥാന്‍, ഉസ്ബക്കിസ്ഥാന്‍, യു.എ.ഇ എന്നിവങ്ങളില്‍ എല്ലാം കണ്ടുവരുന്ന വേരിയബിള്‍ വീറ്റിയര്‍ (variable wheatear) എന്നയിനം കുരുവിയാണ്. സാധാരണ മരുഭൂമികളിലാണ് ഇവയെ അധികം കണ്ടുവരാറുള്ളത്. ഈ കുഞ്ഞന്‍ കുരുവിയാണ് കേരളം കാണാന്‍ തൃശ്ശൂരിലെ ചാവക്കാട് വിരുന്നിനെത്തിയത്.

കോബേര്‍ഡേഴ്‌സ് അംഗവും യു.എന്‍.എച്ച്.സെ്. എക്‌സിക്യൂട്ടീവ് അംഗവുമായ പാര്‍ളിക്കാട് സ്വദേശി കൃഷ്ണകുമാര്‍.കെ.അയ്യരാണ് ഈ കുഞ്ഞന്‍ കുരുവിയുടെ ചിത്രം ക്യാമറയിലാക്കിയത്. വെറും 10 സെന്റീമീറ്ററോളം മാത്രമാണ് സാധാരണ ഇവയുടെ വലുപ്പം. കുഞ്ഞു കുറ്റിച്ചെടികളിലും മറ്റുമായി കണ്ടുവരാറുള്ള ഈ കുഞ്ഞുകുരുവി പുഴക്കളെയും പൂമ്പാറ്റകളെയും മറ്റുമാണ് ഭക്ഷണമാക്കാറുള്ളത്. എന്തായാലും പക്ഷിനിരീക്ഷകര്‍ക്കും പ്രകൃതിപഠനക്കാര്‍ക്കുമ ഇതൊരു സന്തോഷം തരുന്ന വാര്‍ത്തയാണ്. ചിലപ്പോള്‍ സൂക്ഷിച്ചു നോക്കിയാല്‍ നമുക്ക് ഈ അതിഥി കുരുവിയെ പരിസരത്ത് കണ്ടെത്തുവാന്‍ സാധിച്ചേക്കും. (ചിത്രം എടുത്തത്: കൃഷ്ണകുമാര്‍. കെ. അയ്യര്‍)