ഇന്ത്യക്കാർക്കെതിരായ ആക്രമണം; പ്രതിനിധികളുടെ യോഗം വിളിച്ച് Tánaiste

അയർലണ്ടിൽ ഇന്ത്യൻ പൗരന്മാർക്കെതിരായ ആക്രമണങ്ങൾ വർദ്ധിച്ചുവരുന്ന സാഹചര്യത്തിൽ, ഇന്ത്യക്കാരുടെ സുരക്ഷ ഉറപ്പാക്കുന്നതിനായി Tánaiste സൈമൺ ഹാരിസ് തിങ്കളാഴ്ച ഇന്ത്യൻ പ്രതിനിധികളുമായി കൂടിക്കാഴ്ച നടത്തുമെന്ന് ഐറിഷ് എംബസി അറിയിച്ചു. ഇന്ത്യൻ സമൂഹത്തിലെ അംഗങ്ങൾക്കെതിരായ വിവേചനരഹിതമായ ആക്രമണങ്ങളിൽ എംബസി ഞെട്ടൽ പ്രകടിപ്പിച്ചു.

“അയർലണ്ടിലെ ഇന്ത്യൻ സമൂഹം ഐറിഷ് സമൂഹത്തിന് മികച്ച സംഭാവനകൾ നൽകിയിട്ടുണ്ട്, ഇപ്പോഴും നൽകുന്നുമുണ്ട്. അവരെ സ്വാഗതം ചെയ്യുന്നു. അവരെ അഭിനന്ദിക്കുന്നു. അടുത്ത ആഴ്ച, അയർലൻഡ് ഇന്ത്യ കൗൺസിലുമായി കൂടിക്കാഴ്ച നടത്താൻ ഞാൻ ആഗ്രഹിക്കുന്നു.”- സൈമൺ ഹാരിസ് അറിയിച്ചു. അയർലൻഡ് ഒരിക്കലും വംശീയതയെ വെച്ചുപൊറുപ്പിക്കില്ല എന്നും സോഷ്യൽ മീഡിയ പോസ്റ്റിൽ സൈമൺ ഹാരിസ് പറഞ്ഞു.

അയർലണ്ടിൽ ഇന്ത്യൻ പൗരന്മാർക്കെതിരെ അടുത്തിടെ നടന്ന അക്രമങ്ങളിൽ ന്യൂഡൽഹിയിലെ അയർലൻഡ് എംബസി അപലപിച്ചു. അയർലൻഡ് വിലമതിക്കുന്ന സമത്വത്തിന്റെയും മനുഷ്യാന്തസ്സിന്റെയും മൂല്യങ്ങൾക്കു നേരെയുള്ള ആക്രമണമാണിതെന്നും എംബസി പ്രസ്താവനയിൽ പറഞ്ഞു. വംശീയതയ്ക്കും വിദേശീയ വിദ്വേഷത്തിനും ഐറിഷ് സമൂഹത്തിൽ സ്ഥാനമില്ല. ചുരുക്കം ചിലരുടെ പ്രവർത്തനങ്ങൾ ഐറിഷ് ജനതയുടെ മനോഭാവത്തെ പ്രതിഫലിപ്പിക്കുന്നില്ല. കുറ്റവാളികൾക്കെതിരെ വേഗത്തിലുള്ള പോലീസ് നടപടിയുടെ ആവശ്യകത ഇന്ത്യൻ അധികാരികൾ ഉയർത്തിക്കാട്ടുന്നതായും എംബസി അറിയിച്ചു.