വെനസ്വേലയെ എതിരില്ലാതെ വീഴ്ത്തി അർജന്റീന

ബ്യൂണസ് അയേഴ്സ്: ലോകകപ്പ് യോഗ്യതാ മത്സരത്തിൽ അർജന്റീന വെനസ്വേലയെ എതിരില്ലാതെ വീഴ്ത്തി. മത്സരത്തിൽ സൂപ്പർതാരം ലയണൽ മെസ്സി ഗോളടിച്ചു തിളങ്ങി. അർജന്റീനയുടെ തട്ടകത്തിൽ നടന്ന മത്സരത്തിൽ എതിരില്ലാത്ത മൂന്നു ഗോളുകൾക്കാണ് ആതിഥേയരുടെ വിജയം.

നിക്കോളാസ് ഗോൺസാലസ് (35), എയ്ഞ്ചൽ ഡി മരിയ (79), ലയണൽ മെസ്സി (82) എന്നിവരാണ് അർജന്റീനയ്ക്കായി ഗോൾ നേടിയത്.

ഖത്തർ ലോകകപ്പിന് മുൻപേതന്നെ യോഗ്യത ഉറപ്പാക്കിയ അർജന്റീന, ഈ വിജയത്തോടെ പോയിന്റ് പട്ടികയിൽ ബ്രസീലിനു താഴെ രണ്ടാമതെത്തി. 16 മത്സരങ്ങളിൽ നിന്ന് 42 പോയിന്റുമായാണ് ബ്രസീൽ ഒന്നാമതു നിൽക്കുന്നത്. അത്രയും മത്സരങ്ങളിൽ നിന്ന് അർജന്റീനയ്ക്ക് 38 പോയിന്റുണ്ട്.