ഭൂമിയ്ക്ക് ഭീഷണിയായിരുന്ന ഓസോണ്‍ പാളിയിലെ വലിയ സുഷിരം അടഞ്ഞതായി റിപ്പോര്‍ട്ട്

ഭൂമിയ്ക്ക് ഭീഷണിയായിരുന്ന ഓസോണ്‍ പാളിയിലെ വലിയ സുഷിരം അടഞ്ഞതായി റിപ്പോര്‍ട്ട്. ഓസോണ്‍ പാളിയില്‍ ഇതുവരെയുണ്ടായതില്‍ വച്ച് ഏറ്റവും വലിയ സുഷിരമാണ് ഇല്ലാതായിരിക്കുന്നത്. 

പത്ത് ലക്ഷം കിലോമീറ്റര്‍ വിസ്തൃതിയായിരുന്നു ഈ സുഷിരത്തിനുണ്ടായിരുന്നത്. സൂര്യനില്‍ നിന്നും പുറപ്പെട്ട് വരുന്ന അള്‍ട്രാ വൈലറ്റ് രശ്മികള്‍ അടക്കമുള്ള സൂര്യരശ്മികളെ ഭൂമിയിലെത്തിക്കാതെ തടയുന്നത് ഓസോണ്‍ പാളികളാണ്. 

കോപര്‍നിക്കസ് അറ്റ്‌മോസ്ഫിയര്‍ മോണിറ്ററിംഗ് സര്‍വീസാണ് ഇക്കാര്യം അറിയിച്ചിരിക്കുന്നത്. ഭൂമിയുടെ അന്തരീക്ഷത്തെ കുറിച്ച് നിരന്തരം നിരീക്ഷിക്കുന്ന മോണിറ്ററിംഗ് സര്‍വീസാണിത്.

യൂറോപ്യന്‍ യൂണിയന്റെ അന്തരീക്ഷ നിരീക്ഷണ സംവിധാനമായ കോപര്‍നിക്കസും വീഡിയോ സഹിതം ഇക്കാര്യം വ്യക്തമാക്കിയിട്ടുണ്ട്. ധ്രുവപ്രദേശങ്ങളിലെ ചുഴലി ശക്തി കുറഞ്ഞതാണ് ഓസോണ്‍ പാളി പഴയ നിലയിലെത്താന്‍ കാരണം.