ദുബായ് യാത്രയ്ക്ക് 72 മണിക്കൂറിനിടെ നടത്തിയ കോവിഡ് നെഗറ്റീവ് രേഖ നിര്‍ബന്ധം

ദുബായ്: കോവിഡ് വാക്‌സിനേഷന്‍ ലോകത്ത് ആരംഭിച്ചുവെങ്കിലും ഇപ്പോഴും കോവിഡ് വ്യാപനം പലയിടത്തും രൂക്ഷമായികൊണ്ടിരിക്കുന്ന സാഹചര്യത്തില്‍ ദുബായിലേക്ക് വരുന്ന യാത്രക്കാരുടെ കോവിഡ് മാനദണ്ഡങ്ങളില്‍ ചില മാറ്റങ്ങള്‍ വരുത്തി. ഇതുപ്രകാരം 72 മണിക്കൂര്‍ മുന്‍പ് നടത്തിയ ആര്‍.ടി.പി.സി.ആര്‍ കോവിഡ് ടെസ്റ്റ് റിസള്‍ട്ട് നിര്‍ബന്ധമാക്കി.

മുന്‍പ് 96 മണിക്കൂര്‍ മുന്‍പത്തെ ആര്‍.ടി.പി.സി.ആര്‍ ടെസ്റ്റ് മതിയായിരുന്നു. എന്നാല്‍ അത് 72 മണിക്കൂറാക്കി ചുരുക്കി. യാത്രികര്‍ നെഗറ്റീവ് ആയതിന്റെ റിസള്‍ട്ട് അംഗീകൃത ഹോസ്പിറ്റല്‍, ലാബുകള്‍ എന്നിവയില്‍ നിന്നും ലഭ്യമായതിന്റെ ഇംഗ്ലീഷ് / അറബി രേഖസഹിതമാവണം യാത്രയ്ക്ക് എത്തേണ്ടത്. അതേസമയം ചിലര്‍ ഡിജിറ്റല്‍ സര്‍ട്ടിഫിക്കറ്റും എസ്.എം.എസുമായും യാത്ര ചെയ്യാന്‍ വരുന്നുണ്ട്. അത് മതിയാവില്ലെന്ന് പ്രത്യേകം അധികൃതര്‍ പറയുന്നുണ്ട്.

അതേ സമയം കോവിഡ് മാര്‍ഗ്ഗനിര്‍ദ്ദേശങ്ങളും മറ്റും നല്‍കുന്ന അല്‍-ഹൊസ്ന്‍ ആപ്പ് നിര്‍ബന്ധമായും ഡൗണ്‍ലോഡ് ചെയ്യണമെന്നും അധികൃതര്‍ പ്രത്യേകം നിര്‍ദ്ദേശിച്ചിട്ടുണ്ട്.