കിറ്ക്കൻ ആരംഭിച്ചു

പൊലീസ് സ്റ്റേഷൻ അത്ര മോശം സ്ഥലമൊന്നുമല്ല. ഈ ടാഗോടെ എത്തുന്ന പുതിയ ചിത്രമാണ് കിറ്ക്കൻ: ഈ ചിത്രത്തിൻ്റ ബഹുഭൂരിപക്ഷം വരുന്ന രംഗങ്ങളും ചിത്രീകരിക്കുന്നതും ഒരു പൊലീസ് സ്റ്റേഷനിലാണ്. നവാഗതനായ ജോഷ് ഈ ചിത്രം തിരക്കഥ രചിച്ച് സംവിധാനം ചെയ്യുന്നു. മേജർ രവി, ജോൺ റോബിൻസൺ, ജയറാം കൈലാസ് എന്നിവർക്കൊപ്പം പ്രവർത്തിച്ചു പോന്നിരുന്നു ജോഷ്.

ആന്മഹത്യാക്കുറിപ്പെഴുതി വച്ച് ആന്മഹത്യ ചെയ്ത ഒരു പെൺകുട്ടിയുടെ പോസ്റ്റ്മോർട്ടം റിപ്പോർട്ടിലുണ്ടായ സംശയം പൊലീസ് ഡിപ്പാർട്ട് മെൻ്റിനെ ഈ കേസിൻ്റെ പുനരന്വേണത്തിലെത്തിച്ചേരാൻ ഇടയാക്കുന്നു. തുടരന്വേഷണത്തിലൂടെ ഉരിത്തിരിയുന്ന സംഭവങ്ങളാണ് ഈ ചിത്രത്തിലൂടെ അവതരിപ്പിക്കുന്നത്. പൂർണ്ണമായ ഒരു ത്രില്ലർ സ്വഭാവത്തോടെയാണ് ഈ ചിത്രത്തിൻ്റെ അവതരണം.

ഔൾ മീഡിയാ എൻ്റെർടൈൻമെൻ്റിൻ്റെ ബാനറിൽ അജിത് നായർ, ബിന്ധ്യ അജീഷ് എന്നിവർ നിർമ്മിക്കുന്ന ഈ ചിത്രത്തിൻ്റെ ചിത്രീകരണം പാലക്കാട്ടെ വടക്കഞ്ചേരി ,നെന്മാറ ‘പോത്തുണ്ടി ഡാം പ്രദേശങ്ങളിലായി പുരോഗമിക്കുന്നു. ഏ.ആർ.കണ്ണനാണ് ലൈൻ പ്രൊഡ്യൂസർ. കുറച്ചു നാളുകൾക്കു മുമ്പ് കോട്ടയത്തു നടന്ന ഒരു സംഭവമാണ്‌ ഈ ചിത്രത്തിൻ്റെ മൂല കഥ.

മലയാള സിനിമയിൽ വേറിട്ട ചിന്തകളുള്ള കനികുസ്രുതി ഈ ചിത്രത്തിൽ സുപ്രധാനമായ ഒരു കഥാപാത്രത്തെ അവതരിപ്പിക്കുന്നു എന്നത് ഈ ചിത്രത്തെ ഏറെ കൗതുകമുയർത്തുന്നു. പൊലീസ് കോൺസ്റ്റബിൾ ആയിട്ടാണ് കനി ഈ ചിത്രത്തിൽ അഭിനയിക്കുന്നത്.

സലിംകുമാർ, വിജയരാഘവൻ, മഗ് ബൂൽ സൽമാൻ, ജോണി ആൻ്റണി.അനാർക്കലി മരയ്ക്കാർ, അഭിജ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. എട്ട് പ്രമുവ താരങ്ങളും മുപ്പതോളം പുതുമുഖങ്ങളും ഈ ചിത്രത്തിലണി നിരക്കുന്നുണ്ട്. ഇതിലെ പുതുമുഖങ്ങൾക്ക് പ്രത്യേക പരിശീലനം നൽകിയാണഭിനയിപ്പിക്കുന്നത്. നാടകപ്രവർത്തകരും, പുതുമുഖങ്ങളുമെല്ലാം ഇക്കൂട്ടത്തിലുണ്ട്.

ചെമ്പൻ വിനോദിൻ്റെ സഹോദരൻ ഉല്ലാസ് ചെമ്പൻ്റേതാണ് ഈ ചിത്രത്തിൻ്റെ മൂല കഥ. സംഗീതം- മണികണ്ഠൻ അയ്യപ്പ. ഗൗതം ലെനിൻ ഛായാഗ്രഹണം നിർവ്വഹിക്കുന്നു. എഡിറ്റിംഗ് – രോഹിത് വി.എസ്. കലാസംവിധാനം. സന്തോഷ് വെഞ്ഞാറമൂട് മേക്കപ്പ്. സുനിൽ നാട്ടക്കൽ, കോസ്റ്റ്യം -ഡിസൈൻ – ഇന്ദ്രൻസ് ജയൻ. ആക്ഷൻ – മാഫിയാ ശശി. അസ്സോസ്സിയേറ്റ് ഡയറക്ടർ അമൽ വ്യാസ്.പ്രൊഡക്ഷൻ കൺട്രോളർ-ഡി. മുരളി.ഈ ചിത്രത്തിൻ്റെ ചിത്രീകരണം പുരോഗമിക്കുന്നു. ഫോട്ടോ .ജയപ്രകാശ് അതളൂർ.

വാഴൂർ ജോസ്.