ദുര്‍ഗ്ഗദേവിയായി വേഷമിട്ടു എം.പി.ക്ക് വധഭീഷണി

കൊല്‍ക്കത്ത: സിനിമാ താരങ്ങള്‍ എം.പി.യായി മത്സരിക്കുമ്പോള്‍ ജയിച്ചുകഴിഞ്ഞാലും ചിലപ്പോള്‍ അവര്‍ പല വേഷങ്ങളും ഇട്ടെന്നിരിക്കും. തൃണമൂല്‍ കോണ്‍ഗ്രസിന്റെ എം.പി.യും സിനിമാ താരവുമായ നുസ്രത്ത് ജഹാനാണ് ഇപ്പോള്‍ പുലിവാലു പിടിച്ചത്.

ഒരു പരസ്യചിത്രത്തിന് വേണ്ടി ദുര്‍ഗ്ഗാദേവിയുടെ വേഷം അവര്‍ ധരിച്ചതാണ് വിവാദമായത്. അവര്‍ പരസ്യചിത്രത്തില്‍ അഭിനയിക്കുകയും അതിന്റെ ചിത്രങ്ങള്‍ തന്റെ ഓഫീഷ്യല്‍ പേജിലൂടെ ലോകത്തെ മുഴുവന്‍ അറിയിക്കും സമൂഹ മാധ്യമമായ ഇന്‍സ്റ്റാഗ്രാമില്‍ പോസ്റ്റു ചെയ്തതോടെയാണ് നടിയായ എം.പി.ക്കെതിരെ വധഭീഷണി വന്നത്.

സപ്തംബര്‍ 16, 19 തിയതികളിലായി പോസ്റ്റു ചെയ്യപ്പെട്ട ഫോട്ടോയുടെയും വീഡിയോയുടെയും അടിസ്ഥാനത്തിലാണ് വധഭീഷണി വന്നിരിക്കുന്നത് എന്ന് നടിയുടെ ഓഫീസ് അറിയിച്ചു. നടി തികച്ചും ഒരു കലാകാരിയായ നിലയിലാണ് ഇത് ചെയ്തതെന്നും മതനിരപേക്ഷവും സമഗ്രവുമായ അവരുടെ കാഴ്ചപ്പാടിനെ മാനിക്കണമെന്നും ഈ ട്രോളുകളും ഭീഷണികളും അവരെ യാതൊരു വിധത്തിലും ബാധിക്കില്ലെന്നുമാണ് അടുത്ത സുഹൃത്തുക്കളുടെ അഭിപ്രായം.

ഇന്ത്യയിലെ മതവിഭ്രാന്തിയുള്ള ചിലരും ബംഗ്ലാദേശിലെ ചിലരുമാണ് നടിക്കെതിരെ വധഭീഷണി മുഴക്കിയിരിക്കുന്നത്. പോലീസ് വിശദമായി അന്വേഷിച്ചു വരികയാണ്. ഈ സാഹചര്യത്തില്‍ സുസ്രത്ത് ജഹാന്‍ ലണ്ടനില്‍ ഷൂട്ടിങിനായി പോയിരിക്കുകയാണെന്നും ലണ്ടനിലെ അധികാരികളെ വിവരം ധരിപ്പിച്ചിട്ടുണ്ടെന്നും സുരക്ഷ ശക്തമായിട്ടുണ്ടെന്നും പറഞ്ഞു.