ഇ-നിയമസഭ പദ്ധതിയുടെ ആദ്യ സമ്മേളനം ഇന്ന്!!

ഗവര്‍ണറുടെ നയപ്രഖ്യാപന പ്രസംഗത്തോടെ ബജറ്റ് സമ്മേളനത്തിനു ഇന്ന് തുടക്കമാകും. ആകെ പത്ത് ദിവസമാണ് സഭ സമ്മേളിക്കുന്നത്.

രാവിലെ 8.50നു നിയമസഭാ മന്ദിരത്തിലെത്തുന്ന ഗവർണർ ഗാർഡ് ഓഫ് ഓണർ സ്വീകരിക്കും. 9നാണ് നയപ്രഖ്യാപന പ്രസംഗം. എല്ലാ രേഖകളും ഇലക്ട്രോണിക് രൂപത്തിൽ എംഎൽഎമാർക്കു ലഭിക്കുന്ന ഇ-നിയമസഭ പദ്ധതിയുടെ ആദ്യ സമ്മേളനമാണിത്. 

വായിച്ചു കഴിയുന്ന ഓരോ പേജും‌ മേശപ്പുറത്തെ സ്ക്രീനിൽ കാണാം ((ഉദാ: 8–ാം പേജാണ് വായിക്കുന്നതെങ്കിൽ 7–ാം പേജാകും സ്ക്രീനിൽ). രേഖയുടെ രഹസ്യസ്വഭാവം കാക്കുന്നതിനാണ് ഈ രീതി.

നേരത്തെ പ്രസംഗത്തിന്‍റെ പകർപ്പിനായി ഗവർണറുടെ നയപ്രഖ്യാപനവും ധനമന്ത്രിയുടെ ബജറ്റ് അവതരണവും തീരും വരെ നിയമസഭാംഗങ്ങൾ  കാത്തിരിക്കണമായിരുന്നു. 

യപ്രഖ്യാപനവും ബജറ്റും മേശപ്പുറത്തുള്ള ഡിജിറ്റൽ സ്ക്രീൻ നോക്കിയാകും ഗവർണറും ധനമന്ത്രിയും അവതരിപ്പിക്കുക. പ്രസംഗം വായിക്കാൻ ഗവർണർക്ക് 21 ഇഞ്ച് ടച്ച് മോണിറ്ററുണ്ട്.

നയപ്രഖ്യാപന പ്രസംഗത്തിനിടെ സാങ്കേതികതടസ്സമുണ്ടായാൽ പകരം ഉപയോഗിക്കാൻ അച്ചടിച്ച രൂപവും ഗവർണർക്കു കൈമാറും. 

അധികം വൈകാതെ സാമാജികർ ഹാജർ വയ്ക്കുന്നതും മേശപ്പുറത്തിരിക്കുന്ന ടച്ച് സ്ക്രീൻ ലോഗിൻ ചെയ്യുന്നതും വിരലടയാളം ഉപയോഗിച്ചായിരിക്കും. ഇതിനായി എല്ലാ എംഎൽഎമാരുടെയും വിരലടയാളം ശേഖരിക്കും.

ഇ-നിയമസഭ സമ്മേളനത്തിന്‍റെ മറ്റ് പ്രത്യേകതകൾ: 

> ചാറ്റ് വിത്ത് സ്പീക്കർ– വാച്ച് ആൻഡ് വാർഡ് മുഖേന കുറിപ്പു കൊടുത്തു വിടുന്നതിനു പകരം സ്പീക്കറുമായി അംഗത്തിനു ചാറ്റ് ചെയ്യാം. ഉപചോദ്യങ്ങൾക്കായി കൈ ഉയർത്തുന്നതും ഒഴിവാക്കാം.

> ഐപാഡ്– സഭയ്ക്കു പുറത്തെ ആവശ്യങ്ങൾക്കായി എല്ലാ അംഗങ്ങൾക്കും ഐപാഡ്. ഇതിൽ ചോദ്യോത്തരങ്ങളും നോട്ടിസും സമർപ്പിക്കാൻ ആപ്പുകൾ. 

> വോട്ടി൦ഗ്– വോട്ടിങ്ങിനായുള്ള പ്രത്യേക ബട്ടണുകൾ ഒഴിവാക്കും. പകരം സ്ക്രീനിൽ തെളിയുന്ന ടാബുകളിൽ തൊട്ടാൽ മതി.

> ഡോക്യുമെന്‍റ്സ്– ചോദ്യങ്ങൾ ഉന്നയിച്ച അംഗങ്ങൾക്കു 15 മിനിറ്റ് മുൻപ് സിസ്റ്റം വഴി ഉത്തരങ്ങൾ നൽകും. 

യൂസർ നെയിമും പാസ്‌വേഡും

സഭയിൽ വന്നാലുടൻ മുന്നിലുള്ള ടച്ച്സ്‌ക്രീനിൽ എം.എൽ.എ. ലോഗിൻ ചെയ്യണം. ഓരോരുത്തർക്കും യൂസർനെയിമും പാസ്‌വേഡും നൽകും. ലോഗിൻചെയ്താൽ സ്വന്തംഫോട്ടോ ഉൾപ്പെടെ കാണുന്ന ജാലകം സ്ക്രീനിൽ തുറക്കും. 

മെനുവിൽ ഇപ്പോഴത്തെ ബിസിനസ് എന്ന ഇനത്തിൽ തൊട്ടാൽ സഭയിൽ അപ്പോൾ നൽകുന്ന ചോദ്യോത്തരമോ ചർച്ചചെയ്യുന്ന ബില്ലോ ഒക്കെ സ്ക്രീനിൽ തെളിയും.താഴെ സഭയിലെ അപ്പോഴത്തെ ഹാജർനില. എംഎൽഎയുടെ ആ സമ്മേളനത്തിലെ ഹാജർ എന്നിവയും തെളിയും.