പ്രകടമായ ലക്ഷണങ്ങളില്ലാത്ത കൊവിഡ് രോ​ഗികൾക്ക് വീട്ടിൽ തന്നെ ഐസൊലേഷനിൽ തുടരാമെന്ന് സർക്കുലർ പുറത്തിറക്കി ദുബായ് ആരോ​ഗ്യ വകുപ്പ്

ദുബായി: ചെറു രോ​ഗ ലക്ഷണങ്ങളുള്ളതും പ്രകടമായ ലക്ഷണങ്ങളില്ലാത്തതുമായ കൊവിഡ് രോ​ഗികൾക്ക് വീട്ടിൽ തന്നെ ഐസൊലേഷനിൽ തുടരാമെന്ന് സർക്കുലർ പുറത്തിറക്കി ദുബായ് ആരോ​ഗ്യ വകുപ്പ്. നാഷണൽ എമർജൻസി ക്രൈസിസ് ആൻഡ് ഡിസാസ്റ്റർ മാനേജ്മെന്റ് അതോറിറ്റിയുമായി ചേർന്നാണ് ദുബായ് ഹെൽത്ത് അതോറിറ്റി സർക്കുലർ പുറത്തിറക്കിയത്. സെന്റർ ഫോർ ഡിസീസ് കൺട്രോളിന്റെ നിർദേശ പ്രകാരമുള്ളതാണ് സർക്കുലർ.

കൊവിഡ് രോ​ഗികളെ ഡിസ്ചാർജ് ചെയ്യുന്നത്, അഡ്മിറ്റ് ചെയ്യുന്നത് തുടങ്ങിയ വിഷയങ്ങൾ പ്രതിപാദിക്കുന്ന സർക്കുലറിൽ ചെറു ലക്ഷണങ്ങളുള്ള രോ​ഗികൾക്ക് വീട്ടിൽ ഐസൊലേഷനിൽ കഴിയാമെന്നും പറയുന്നുണ്ട്.

ചുമ, തൊണ്ട വേദന, തലവേദന, പേശി വേദന, ക്ഷീണം തുടങ്ങിയവ ചെറിയ രോ​ഗലക്ഷണങ്ങളുടെ പട്ടികയിലാണ് ഉൾപ്പെടുത്തിയിട്ടുള്ളത്.

ആശുപത്രികൾക്ക് താങ്ങാൻ സാധിക്കുന്നതിലും കൂടുതൽ രോ​ഗികൾ എത്തുന്നത് കൊണ്ട് തന്നെ ലോകരോ​ഗ്യ സംഘടന ഉൾപ്പെടെ മാർ​ഗനിർദേശങ്ങൾ പുതുക്കുകയാണെന്ന് ദുബായ് കൊവിഡ് ടാസ്ക് ഫോഴ്സിലെ ഡോക്ടറായ ആദിൽ മുഹമ്മദ് യാസിൻ അൽ സിസി പറഞ്ഞു.

പുതുക്കിയ ​നിർദേശം പ്രകാരം കൊവിഡ് രോ​ഗികളെ അഞ്ചായാണ് തരം തിരിച്ചിരിക്കുന്നത്. പ്രകടമായ രാേ​ഗ ലക്ഷണം ഇല്ലാത്തവർ, ചെറു രോ​ഗ ലക്ഷണമുള്ളവർ, മോഡറേറ്റ്, സിവിയർ, ക്രിട്ടിക്കൽ എന്നിങ്ങനെയാണ് ഈ വേർതിരിവ്.

ഒന്നാമത്തെയും രണ്ടാമത്തെയും വിഭാ​ഗത്തിൽപ്പെടുന്ന രോ​ഗികൾക്ക് തങ്ങളുടെ ഇഷ്ടപ്രകാരം വീടുകളിൽ ഐസൊലേഷനിൽ ഇരിക്കുകയോ അതോ ആശുപത്രികളോട് സമീപമുള്ള ഹോട്ടലുകളിലെ ക്വാറന്റൈൻ റൂമിൽ താമസിക്കുകയോ ചെയ്യാം. എല്ലാ പ്രധാന ഹോസ്പിറ്റലുകളും തങ്ങളുടെ ബിൽഡിങ്ങിനോട് ചേർന്നുള്ള ഹോട്ടലുകളിൽ ക്വാറന്റൈൻ സൗകര്യവും ഒരുക്കിയിട്ടുണ്ട്.