ഇസ്രഈലുമായി സമാധാന പദ്ധതിക്ക് ധാരണയായതിനു പിന്നാലെ യു.എ.ഇക്കു നേരെ ഇറാനിൽ നിന്നും ഭീഷണി

തെഹ് രാൻ: ഇസ്രഈലുമായി സമാധാന പദ്ധതിക്ക് ധാരണയായതിനു പിന്നാലെ യു.എ.ഇക്കു നേരെ ഇറാനിൽ നിന്നും ഭീഷണി. തങ്ങളുടെ ചെറുത്തു നിൽപ്പിനായി യു.എ.ഇ ഇപ്പോൾ ഒരു ഉന്നമായി മാറിയിരിക്കുന്നു എന്നാണ് ഇറാനിലെ പത്രമായ കയ്ഹാനിലെ എഡിറ്റോറിയലിൽ പറയുന്നത്. കടുത്ത നിലപാടുള്ള, സർക്കാരിനോട് അടുത്തു നിൽക്കുന്ന ഈ പത്രത്തിലെ എഡിറ്ററെ നിയമിച്ചത് ഇറാൻ പരമോന്നത നേതാവായ അയത്തൊള്ള അൽ ഖംനേഈ ആണ്.

ഫലസ്തീൻ ജനതയോടുള്ള യു.എ.ഇയുടെ ചതി, ചെറിയ, സമ്പന്നമായ, വലിയ രീതിയിൽ സുരക്ഷയെ ആശ്രയിക്കുന്ന ആ രാജ്യത്തെ ന്യായമായ ഉന്നമാക്കി മാറ്റുന്നു, കയ്ഹാന്റെ ആദ്യ പേജ് എഡിറ്റോറിയയിൽ പറയുന്നു.

യു.എ.ഇക്കെതിരെ ഇറാനിൽ നിന്നും വരുന്ന മൂന്നാമത്തെ രൂക്ഷ പ്രതികരണമാണിത്. നേരത്തെ ഇറാൻ പ്രസിഡന്റ് ഹസ്സൻ റുഹാനിയും യു.എ.ഇക്കെതിരെ രം​ഗത്തു വന്നിരുന്നു.

യു.എ.ഇ ചെയ്തത് വലിയ പിഴവാണെന്ന് റുഹാനി ആരോപിച്ചിരുന്നു.‘ അവര്‍ (യു.എ.ഇ) കരുതിയിരിക്കുന്നതാണ് നല്ലത്. അവര്‍ ഒരു വലിയ തെറ്റ് ചെയ്തു. വഞ്ചനാപരമായ പ്രവൃത്തി. അവരത് മനസ്സിലാക്കുകയും ഈ തെറ്റായ പാത ഉപേക്ഷിക്കുകയും ചെയ്യുമെന്ന് ഞങ്ങള്‍ പ്രതീക്ഷിക്കുന്നു,’ റുഹാനി പറഞ്ഞു. നേരത്തെ വിഷയത്തില്‍ സമാനമായി ഇറാനിയന്‍ റെവല്യൂഷണറി ഗാര്‍ഡും പ്രതികരിച്ചിരുന്നു