കൊറോണ വൈറസ് വ്യാപനം; വീണ്ടും രാത്രി സമയ കർഫ്യൂ ഏർപ്പെടുത്തി ഒമാൻ

ഒമാൻ; കൊറോണ വൈറസ് കൂടുതൽ വ്യാപിക്കുന്നത് ഒഴിവാക്കാൻ കൂടുതൽ അറിയിപ്പ് ഉണ്ടാകുന്നതുവരെ ഒമാൻ എല്ലാ ബീച്ചുകളും അടയ്ക്കുന്നതായി അറിയിച്ചു. ഒക്ടോബർ 11 ഞായറാഴ്ച മുതൽ ഒക്ടോബർ 24 വരെ രാത്രി 8 നും പുലർച്ചെ 5 നും ഇടയിൽ രാത്രി സമയ കർഫ്യൂ വീണ്ടും ഏർപ്പെടുത്താനും രാജ്യം തീരുമാനിച്ചതായി കോവിഡ് -19 സുപ്രീം സമിതി വെള്ളിയാഴ്ച പ്രഖ്യാപിച്ചു.

എല്ലാ പ്രായക്കാർക്കിടയിലും COVID-19 മൂലമുള്ള കേസുകളുടെയും മരണങ്ങളുടെയും എണ്ണം വർദ്ധിച്ചതായി റിപ്പോർട്ടുകൾ വന്ന സാഹചര്യത്തിലാണ് ഈ നടപടി. മുൻകരുതൽ നടപടികൾ പാലിക്കാത്ത വാണിജ്യ പ്രവർത്തനങ്ങൾ അവസാനിപ്പിക്കണമെന്നും കമ്മിറ്റി അധികൃതരോട് ആവശ്യപ്പെട്ടു.

ആശുപത്രി വാർഡുകളിലും തീവ്രപരിചരണ വിഭാഗങ്ങളിലും രോഗികളുടെ എണ്ണം വർദ്ധിച്ചുകൊണ്ടിരിക്കുന്ന സാഹചര്യത്തിൽ ആരോഗ്യമേഖലയിലും ആരോഗ്യ പ്രവർത്തകരിലും വളരെയധികം സമ്മർദ്ദം ഉണ്ടാവുന്നു.

ഒമാനിൽ ഇതുവരെ കോവിഡ് -19 മൂലം മരിച്ചത് 1009 പേരാണ്. 1,04,129 പേർക്ക് രോഗം ബാധിച്ചു. ഗൾഫിലെ ഏറ്റവും ഉയർന്ന രണ്ടാമത്തെ മരണനിരക്ക് ഒമാനിലാണ്. 4,996 മരണങ്ങളുമായി സൗദി അറേബ്യയാണ് ഒന്നാമത്.