ഹൈബ്രിഡ് നയം പാലിക്കാത്ത ജീവനക്കാർക്കെതിരെ സെൻട്രൽ ബാങ്ക്; നിയമം പാലിക്കാത്തവരുടെ പട്ടിക മാനേജർമാർക്ക് നൽകി

വർക്ക്‌ ഫ്രം ഹോം നയം പാലിക്കാത്ത ജീവനക്കാരുടെ പട്ടിക മുതിർന്ന മാനേജർമാർക്ക് കൈമാറി അയർലണ്ടിലെ സെൻട്രൽ ബാങ്ക്. ഹൈബ്രിഡ് ജോലി നയം തുടർച്ചയായി ലംഘിക്കുന്ന ജീവനക്കാരുടെ വിഷയം ‘performance issue’ പരിഗണിച്ച് കൈകാര്യം ചെയ്യുന്നതായാണ് പുറത്തുവന്ന രേഖകൾ വ്യക്തമാക്കുന്നത്. ഏകദേശം 2,100 ജീവനക്കാരുള്ള സെൻട്രൽ ബാങ്ക് കഴിഞ്ഞ നവംബർ മുതലാണ് ജീവനക്കാരുടെ ഓഫിസ് ഹാജർ കർശനമായി നിരീക്ഷിക്കാൻ തുടങ്ങിയത്. നിലവിലെ ഹൈബ്രിഡ് വർക്ക് നയം അനുസരിച്ച് ഭൂരിഭാഗം ജീവനക്കാരും ഓരോ മാസവും ജോലി ദിവസങ്ങളുടെ പകുതി ഓഫിസിൽ ഹാജരാകണം.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

ഐറിഷ് ഇൻഡിപെൻഡന്റിന് ലഭിച്ച വിവരാവകാശ രേഖകൾ പ്രകാരം, ജൂണിൽ 86 ശതമാനം ജീവനക്കാരും നിർബന്ധിത ഓഫിസ് ഹാജർ മാനദണ്ഡം പാലിക്കുകയോ അതിൽ കൂടുതലായി ഹാജരാകുകയോ ചെയ്തു. എന്നാൽ 2025 ഓഗസ്റ്റിൽ, നിരീക്ഷണ സംവിധാനം ആരംഭിക്കുന്നതിന് മുമ്പ്, കുറഞ്ഞത് ഓഫിസിൽ ഹാജരാകേണ്ട മാനദണ്ഡം പാലിച്ചിരുന്നത് വെറും 42 ശതമാനം ജീവനക്കാർ മാത്രമായിരുന്നു. സെൻട്രൽ ബാങ്കിന്റെ ചീഫ് പീപ്പിൾ ഓഫീസർ വില്യം മൊളോയ് തയ്യാറാക്കിയ ഡ്രാഫ്റ്റ് രേഖയിൽ, സ്ഥിരമായി ഹൈബ്രിഡ് ജോലി നയം പാലിക്കാത്ത ജീവനക്കാരുടെ എണ്ണം ഏകദേശം 5 ശതമാനം ആണെന്ന് വ്യക്തമാക്കുന്നു. ഇവരുടെ വിഷയമാണ് ‘performance issue’ പരിഗണിച്ച് കൈകാര്യം ചെയ്യുന്നത്.

എന്നാൽ എല്ലാ സാഹചര്യങ്ങളിലുമുള്ള ഓഫിസ് ഹാജർ കുറവിനെയും നിയമലംഘനമായി കണക്കാക്കുന്നില്ല. മെഡിക്കൽ അല്ലെങ്കിൽ വൈകല്യവുമായി ബന്ധപ്പെട്ട അംഗീകൃത ക്രമീകരണങ്ങളുള്ള ജീവനക്കാർക്കും ഹ്രസ്വകാല വ്യക്തിഗത ആവശ്യങ്ങൾ നേരിടുന്നവർക്കും ആവശ്യമായ പ്രാദേശിക ഇളവുകൾ അനുവദിക്കുന്നതായി ബാങ്ക് വ്യക്തമാക്കി. ഓരോ വിഭാഗത്തിലെയും ജീവനക്കാരുടെ ഹൈബ്രിഡ് വർക്ക് നയം പാലിക്കുന്നതിന്റെ വിവരങ്ങൾ ഡിവിഷൻ മേധാവികൾക്കും ഡയറക്ടർമാർക്കും നൽകുന്നുണ്ട്. നിശ്ചിത ഓഫിസ് ഹാജർ മാനദണ്ഡം പാലിക്കാത്ത ജീവനക്കാരുടെ വിവരങ്ങൾ ആഭ്യന്തര ഡാഷ്ബോർഡിലൂടെ ബന്ധപ്പെട്ട മാനേജർമാർക്ക് ലഭ്യമാക്കുന്നതായും രേഖകൾ വ്യക്തമാക്കുന്നു.

ഹാജർ കുറവുള്ള ജീവനക്കാരുമായി എങ്ങനെ ചർച്ച നടത്തണമെന്നതിനെക്കുറിച്ചുള്ള മാർഗനിർദേശങ്ങളും മാനേജർമാർക്ക് നൽകിയിട്ടുണ്ട്. കെട്ടിടത്തിലെ പ്രവേശന സംവിധാനത്തിലൂടെയുള്ള ഡാറ്റ ഉപയോഗിച്ചാണ് സെൻട്രൽ ബാങ്ക് ഓഫിസ് ഹാജർ നിരീക്ഷിക്കുന്നത്. സ്ഥിരം ജീവനക്കാർക്കാണ് ഈ നിരീക്ഷണം ബാധകം. സെൻട്രൽ ബാങ്കിലെ ഏകദേശം 90 ശതമാനം ജീവനക്കാർക്കും ‘Future@Work’ പദ്ധതിയിലൂടെ ഹൈബ്രിഡ് ജോലി ചെയ്യാനുള്ള സൗകര്യമുണ്ട്. സുരക്ഷ, സൗകര്യ പരിപാലനം തുടങ്ങിയ ജോലികളിലുള്ള ബാക്കിയുള്ള ജീവനക്കാർക്ക് പ്രധാനമായും ഓഫിസിൽ തന്നെ ജോലി ചെയ്യേണ്ടതുണ്ട്.

അതേസമയം, ജീവനക്കാരെ നിരീക്ഷിക്കുന്ന രീതിയെയും ഓഫിസ് ഹാജറിനെ പ്രകടനവുമായി ബന്ധിപ്പിക്കുന്നതിനെയും യൂണൈറ്റ് ട്രേഡ് യൂണിയൻ വിമർശിച്ചു. ജീവനക്കാരെ പ്രൊഫഷണലുകളായി കണ്ട് വിശ്വാസത്തെ അടിസ്ഥാനമാക്കിയുള്ള ഹൈബ്രിഡ് ജോലി സംവിധാനമാണ് വേണ്ടതെന്ന് യൂണിയൻ പറഞ്ഞു. ഓഫിസ് ഹാജറും ജോലി പ്രകടനവും ഒരുപോലെയല്ലെന്നും, ഹാജർ മാനദണ്ഡം പാലിക്കാത്തത് സ്വമേധയാ പ്രകടന പ്രശ്നമായി കണക്കാക്കരുതെന്നും യൂണൈറ്റ് വ്യക്തമാക്കി. കെട്ടിടത്തിലെ പ്രവേശന കാർഡ് ഡാറ്റ മാത്രം ഉപയോഗിച്ച് ജീവനക്കാരുടെ പ്രകടനം വിലയിരുത്തുന്നതും പരിമിതികളുള്ള രീതിയാണെന്ന് യൂണിയൻ ചൂണ്ടിക്കാട്ടി.

അതേസമയം, ഹൈബ്രിഡ് ജോലി നയത്തിലൂടെ സ്ഥാപനത്തിന്റെ നിർണായക പ്രവർത്തനങ്ങളും കൂട്ടായ കാര്യക്ഷമതയും ഉറപ്പാക്കുന്നതിനൊപ്പം ജീവനക്കാർക്ക് ജോലി ചെയ്യുന്ന സ്ഥലത്ത് ആവശ്യമായ സൗകര്യവും നൽകുകയാണ് ലക്ഷ്യമെന്ന് സെൻട്രൽ ബാങ്ക് വ്യക്തമാക്കി. നവംബർ 2025 മുതൽ ആരംഭിച്ച റിപ്പോർട്ടിംഗ് സംവിധാനം വഴി ഭൂരിഭാഗം ജീവനക്കാരും ഓഫിസ് ഹാജർ മാനദണ്ഡം സ്ഥിരമായി പാലിക്കുകയും മറികടക്കുകയും ചെയ്യുന്നതായി കണ്ടെത്തിയെന്നും ബാങ്ക് പറഞ്ഞു. മാനദണ്ഡം പാലിക്കാത്ത സാഹചര്യങ്ങളിൽ വിഷയം നേരിട്ട് കൈകാര്യം ചെയ്യാനും, ആവശ്യമായിടത്ത് കൂടുതൽ ഇളവ് നൽകേണ്ട സാഹചര്യങ്ങൾ മാനേജർമാർക്ക് തിരിച്ചറിയാനും ഈ സംവിധാനം സഹായിക്കുന്നുവെന്നും ബാങ്ക് വ്യക്തമാക്കി.

ജീവനക്കാരുടെ സ്വകാര്യതയും ഡാറ്റ സംരക്ഷണവും നിരീക്ഷണ സംവിധാനം നടപ്പാക്കുമ്പോൾ പ്രധാന പരിഗണനയായിരുന്നുവെന്നും, തുടക്കം മുതൽ ആവശ്യമായ സുരക്ഷാ സംവിധാനങ്ങളും നിയന്ത്രണങ്ങളും ഏർപ്പെടുത്തിയിട്ടുണ്ടെന്നും സെൻട്രൽ ബാങ്ക് അറിയിച്ചു. അയർലണ്ടിലെ മറ്റ് ധനകാര്യ സ്ഥാപനങ്ങളും ഹൈബ്രിഡ് ജോലി നയങ്ങൾ കർശനമാക്കുന്നുണ്ട്. ബാങ്ക് ഓഫ് അയർലണ്ടും AIBയും കഴിഞ്ഞ വർഷം ജീവനക്കാർ ഓഫിസിൽ എത്തേണ്ട ദിവസങ്ങളുടെ എണ്ണം വർധിപ്പിക്കാനുള്ള പദ്ധതികൾ പ്രഖ്യാപിച്ചിരുന്നു. ഓഫിസ് ഹാജർ പ്രകടന വിലയിരുത്തലുമായി ബന്ധിപ്പിക്കുന്നതിനെച്ചൊല്ലി ജീവനക്കാരുടെ സംഘടനയായ ഫിനാൻഷ്യൽ സർവീസസ് യൂണിയൻ (FSU) ഉൾപ്പെടെയുള്ളവർ ആശങ്ക ഉന്നയിച്ചിരുന്നു.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==