ദക്ഷിണാഫ്രിക്കയുടെ ടി-20, ടെസ്റ്റ് ടീം ക്യാപ്റ്റന്‍ സ്ഥാനത്ത് നിന്ന് ഫാഫ് ഡുപ്ലെസിസ് രാജിവെച്ചു

പോര്‍ട്ട് ഓഫ് എലിസബത്ത്: ദക്ഷിണാഫ്രിക്കയുടെ ടി-20, ടെസ്റ്റ് ടീം ക്യാപ്റ്റന്‍ സ്ഥാനത്ത് നിന്ന് ഫാഫ് ഡുപ്ലെസിസ് രാജിവെച്ചു. ഏകദിന ടീം ക്യാപ്റ്റന്‍ സ്ഥാനത്ത് നിന്ന് ജനുവരിയില്‍ തന്നെ ഡുപ്ലെസി മാറിയിരുന്നു.

35 കാരനായ ഡുപ്ലെസിയ്ക്ക് കീഴില്‍ ദക്ഷിണാഫ്രിക്ക മൂന്ന് ഫോര്‍മാറ്റിലുമായി 112 മത്സരങ്ങള്‍ കളിച്ചിട്ടുണ്ട്. 2012 മുതല്‍ ഡുപ്ലെസിയാണ് ദക്ഷിണാഫ്രിക്കയെ നയിച്ചത്.

ക്യാപ്റ്റനെന്ന നിലയില്‍ 5101 റണ്‍സും 11 സെഞ്ച്വറിയും നേടിയിട്ടുണ്ട്. ക്യാപ്റ്റന്‍ സ്ഥാനം രാജിവെക്കുക എന്നത് ബുദ്ധിമുട്ടേറിയ തീരുമാനമായിരുന്നെന്നും എന്നാല്‍ വിരമിക്കുന്നതിനെക്കുറിച്ച് ആലോചിച്ചിട്ടില്ലെന്നും ഡുപ്ലെസി കൂട്ടിച്ചേര്‍ത്തു.

നേരത്തെ ഇംഗ്ലണ്ടിനെതിരായ ഏകദിന-ടി-20 മത്സരങ്ങളില്‍ നിന്ന് ഡുപ്ലെസി വിട്ടുനിന്നിരുന്നു. ഇംഗ്ലണ്ടിനെതിരായ ടെസ്റ്റ് പരമ്പരയ്ക്ക് ശേഷം വിരമിക്കുമെന്ന വാര്‍ത്തകള്‍ വന്നിരുന്നെങ്കിലും താരം നിഷേധിച്ചിരുന്നു. ടി-20 ലോകകപ്പില്‍ കളിക്കുമെന്നും താരം പറഞ്ഞിരുന്നു.

2012 ല്‍ ന്യൂസിലാന്റിനെതിരായ മത്സരത്തിലാണ് ഡുപ്ലെസി ആദ്യമായി ക്യാപ്റ്റനാകുന്നത്. പിന്നീട് 2013 ല്‍ ടി-20യില്‍ സ്ഥിരം ക്യാപ്റ്റനായി. പിന്നീട് ഡിവില്ലിയേഴ്‌സ് സ്ഥാനത്ത് നിന്ന് മാറിയതിന് ശേഷമാണ് മൂന്ന് ഫോര്‍മാറ്റിലും നായകനായത്.