ഉത്തർപ്രദേശിൽ ട്രക്കുകൾ കൂട്ടിയിടിച്ച് 24 അതിഥി തൊഴിലാളികൾ മരിച്ചു

ലക്നൗ: ഉത്തർപ്രദേശിൽ ട്രക്കുകൾ കൂട്ടിയിടിച്ച് 24 അതിഥി തൊഴിലാളികൾ മരിച്ചു. പുലർച്ചെ മൂന്ന് മണിക്ക് തൊഴിലാളികൽ സഞ്ചരിക്കുന്ന ട്രക്ക് മറ്റൊരു ട്രക്കുമായി കൂട്ടിയിടിച്ചായിരുന്നു അപകടം.

രാജസ്ഥാനിൽ നിന്ന് ബീഹാർ, ജാർഖണ്ഡ്, പശ്ചിമ ബം​ഗാൾ എന്നിവിടങ്ങളിലേക്ക് യാത്രതിരിച്ച അതിഥി തൊഴിലാളികളുടെ സംഘമാണ് അപകടത്തിൽപ്പെട്ടത്.

ഭക്ഷണം കൊണ്ടുപോകുന്ന ട്രക്കിലായിരുന്നു ഇവർ നാട്ടിലേക്ക് മടങ്ങിയത്. പ്രാദേശിക പൊലീസ് സ്ഥലത്ത് എത്തിയാണ് രക്ഷാപ്രവർത്തനം നടത്തിയത്. അപകടത്തിന്റെ ദൃശ്യങ്ങളും പൊലീസിന് ലഭിച്ചിട്ടുണ്ടെന്നാണ് സൂചന.

സംഭവത്തിൽ അനുശോചനമറിയിച്ച് ഉത്തർപ്രദേശ് മുഖ്യമന്ത്രി ആദിത്യനാഥ് രം​ഗത്തെത്തി. അപകടത്തിൽപ്പെട്ടവർക്ക് ആവശ്യമായ വൈദ്യസഹായം ഉറപ്പുവരുത്താൻ കാൺപൂർ ഐ.ജിയോട് ആവശ്യപ്പെട്ടിട്ടുണ്ടെന്നും ആദിത്യനാഥ് കൂട്ടിച്ചേർത്തു.