റാഗിങ് പരാതിയിൽ അലൻ ഷുഹൈബ് കസ്റ്റഡിയിൽ; എസ്എഫ്ഐയുടേത് ആസൂത്രിത നീക്കമെന്ന് ആരോപണം

യുഎപിഎ കേസിൽ ജാമ്യത്തിൽ കഴിയുന്ന അലൻ ഷുഹൈബിനെ പൊലീസ് കസ്റ്റഡിയിലെടുത്തു. അലൻ ഷുഹൈബിനെതിരെ റാഗിങ് പരാതിയുമായി എസ്എഫ്ഐ രംഗത്തുവന്നു. എസ്എഫ്ഐ പ്രവർത്തകരുടെ പരാതിയിലാണ് അലനെ ധർമടം പൊലീസ് കസ്റ്റഡിയിലെടുത്തത്.

കണ്ണൂർ പാലയാട് കാമ്പസിലാണ് വിദ്യാർത്ഥി സംഘർഷമുണ്ടായത്. എസ്എഫ്ഐ പ്രവർത്തകരും സംയുക്ത വിദ്യാർത്ഥി സംഘടനാ പ്രവർത്തകരും തമ്മിലാണ് സംഘർഷമുണ്ടായത്. സംഘർഷത്തിന് പിന്നാലെ അലൻ ഷുഹൈബിനെതിരെ എസ്എഫ്ഐ പ്രവർത്തകർ പരാതിയുമായി പൊലീസിനെസമീപിക്കുകയായിരുന്നു.

ഒന്നാം വർഷ വിദ്യാർത്ഥികളെ സംയുക്ത വിദ്യാർത്ഥി സംഘടനാ പ്രവർത്തകർ റാഗ് ചെതെന്നാണ്എസ്എഫ്ഐയുടെ പരാതി. കാമ്പസിലെ നിയമവിദ്യാർത്ഥിയാണ് അലൻ. റാഗിങിൽ വിദ്യാർത്ഥിക്ക് മർദനമേറ്റെന്നാണ് എസ്എഫ്ഐയുടെ ആരോപണം.സംഘർഷത്തിലുണ്ടായിരുന്ന ചില വിദ്യാർത്ഥികൾ ആശുപത്രിയിൽ ചികിത്സ തേടിയിരുന്നു.

അതേസമയം അലൻ ഷുഹൈബിനെതിരെ എസ്എഫ്ഐ വ്യാജ പരാതി നൽകുകയായിരുന്നെന്നും ആസൂത്രിതമാണെന്നും സംയുക്ത വിദ്യാർത്ഥി സംഘടനാ പ്രവർത്തകർ ആരോപിച്ചു.