തീവ്രചലന പരിമിതിയുള്ള ഭിന്നശേഷി കുട്ടികളുടെ ജൈവ വൈവിധ്യ ചെറുവനം’പച്ചിലക്കാട്’ പദ്ധതിക്ക് തുടക്കമായി

കോഴിക്കോട്: തീവ്രചലന പരിമിതിയുള്ള ഭിന്നശേഷി കുട്ടികളുടെ ജൈവ വൈവിധ്യ ചെറുവനം’പച്ചിലക്കാട്’ പദ്ധതിക്ക് തുടക്കമായി.കുന്നുമ്മല്‍ ബി.ആര്‍.സിയുടേയും മരുതോങ്കര ഗ്രാമപഞ്ചായത്ത്, കുന്നുമ്മല്‍ ബ്ലോക്ക് പഞ്ചായത്തുകളുടേയും സംയുക്താഭിമുഖ്യത്തിലാണ് പരിപാടി സംഘടിപ്പിച്ചത്.

കോഴിക്കോട് ജില്ലയിലെ കുന്നുമ്മല്‍ ബ്ലോക്ക് റിസോഴ്‌സ് സെന്ററിനു കീഴില്‍ ഗൃഹാധിഷ്ഠിത വിദ്യാഭ്യാസം നല്‍കിവരുന്ന 25 കുട്ടികള്‍ ആണ് ‘പച്ചിലക്കാട് ‘ എന്ന പേരില്‍ ഒരേക്കറോളം വരുന്ന പുറമ്പോക്ക് ഭൂമിയില്‍ മരങ്ങള്‍ നട്ട് സാമൂഹിക പങ്കാളിത്തത്തോടെ സംരക്ഷിച്ച് ചെറു വനം സൃഷ്ടിക്കാനൊരുങ്ങുന്നത്.

കേന്ദ്രസര്‍ക്കാരിന്റെ സിവിലിയന്‍ ബഹുമതിയായ ‘നാരിപുരസ്‌കാര’ ജേതാവ് ശ്രീമതി.ദേവകി അമ്മയോടൊപ്പം തീവ്രചലന പരിമിതിയുള്‍പ്പെടെയുള്ള ഭിന്നശേഷി കുട്ടികള്‍ വൃക്ഷത്തൈ നട്ടു കൊണ്ടായിരുന്നു പരിപാടി ഉദ്ഘാടനം ചെയ്തത്.

മരുതോങ്കര ഗ്രാമപഞ്ചായത്ത് പ്രസിഡണ്ട്: സതി അദ്ധ്യക്ഷയായ ചടങ്ങില്‍ കുന്നുമ്മല്‍ ബ്ലോക്ക് പഞ്ചായത്ത് പ്രസിഡണ്ട് കെ.സജിത്ത് മുഖ്യാതിഥിയായിരുന്നു. നാരീ പുരസ്‌കാരം ലഭിച്ച ദേവകിയമ്മയെ എസ്.എസ്. കെ. കോഴിക്കോട് ജില്ലാ പ്രോജക്ട് കോഡിനേറ്റര്‍ എ.കെ.അബ്ദുള്‍ഹക്കിം ആദരിച്ചു.