പള്ളിപ്പുറത്തു നിന്ന് കാണാതായ യുവതി വേമ്പനാട്ടു കായലിൽ മരിച്ച നിലയിൽ

പൂച്ചാക്കൽ: പള്ളിപ്പുറത്തു നിന്നു കഴിഞ്ഞദിവസം കാണാതായ യുവതിയെ വേമ്പനാട്ടു കായലിൽ മരിച്ച നിലയിൽ കണ്ടെത്തി. പള്ളിപ്പുറം വെളീപറമ്പ് സജിയുടെ മകൾ ജിതിനയെ (23) ആണ് ഇന്നലെ വേമ്പനാട്ടു കായൽ പള്ളിപ്പുറം കടവിനു തെക്കുഭാഗത്തു മരിച്ച നിലയിൽ കണ്ടെത്തിയത്.

അമ്മ ഷീജ പൊലീസിൽ നൽകിയ പരാതിയെത്തുടർന്നു നടത്തിയ അന്വേഷണത്തിൽ, 12 മണിയോടെ മൊബൈൽ ഫോൺ ഓഫായെന്നു കണ്ടെത്തിയിരുന്നു. ഉച്ചയോടെയാണ് പള്ളിപ്പുറം കടവിനു സമീപം മൃതദേഹം കണ്ടെത്തിയത്. ചേർത്തല പൊലീസ് സ്ഥലത്തെത്തി പരിശോധന നടത്തി. ജിതിന ധരിച്ചിരുന്ന ആഭരണങ്ങൾ ശരീരത്തിലുണ്ടായിരുന്നു. മൃതദേഹം ആലപ്പുഴ മെഡിക്കൽ കോളജ് ആശുപത്രി മോർച്ചറിയിലേക്കു മാറ്റി.