വായ്പ ലഭിക്കാത്തതിൽ മനംനൊന്ത് സ്വയംതൊഴിൽ സംരംഭം തുടങ്ങാൻ നിർമിച്ച ഷെഡിൽ ഇരുപത്തിമൂന്നുകാരൻ തൂങ്ങിമരിച്ചു

കണ്ണൂർ: വായ്പ ലഭിക്കാൻ സാധ്യതയില്ലാതായതോടെ മനംമടുത്ത യുവാവ് ആത്മത്യചെയ്തു. സ്വയംതൊഴിൽ സംരംഭം തുടങ്ങാനായി നിർമിച്ച ഷെഡിലാണ് കണ്ണൂർ ജില്ലയിലെ കേളകം പഞ്ചായത്തിൽ നിസാർ കവല സ്വദേശി അഭിനന്ദ് നാഥ്(23) തൂങ്ങിമരിച്ചത്. ബാങ്ക് വായ്പ ലഭിക്കാൻ സാധ്യതയില്ലെന്നും പ്രതീക്ഷകൾ നശിച്ചതായും വീട്ടുകാരോടും സുഹൃത്തുക്കളോടും സൂചിപ്പിച്ചതിന് പിന്നാലെയാണ് ഇന്നു രാവിലെ അഭിനന്ദിനെ മരിച്ചനിലയിൽ കണ്ടെത്തിയത്.

കമ്പിവേലി നിർമാണ യൂണിറ്റ് തുടങ്ങാനായിരുന്നു അഭിനന്ദിന്റെ പദ്ധതി. മുൻപ് വിദേശത്ത് പോകാൻ ശ്രമിച്ചെങ്കിലും ഏജന്റിന്റെ വഞ്ചനയിൽ കുടുങ്ങി പണം നഷ്ടപ്പെട്ടതോടെയാണ് നാട്ടിൽ സ്വയംതൊഴിൽ സംരംഭം തുടങ്ങാൻ പദ്ധതിയിട്ടത്. കൈവശമുള്ള പണവും വായ്പ തുകയും ചേർത്ത് സംരംഭം തുടങ്ങാനായിരുന്നു ശ്രമം. വായ്പ ലഭിക്കുമെന്ന പ്രതീക്ഷയിൽ ആയിരുന്നു അഭിനന്ദ്. നടപടി ക്രമങ്ങൾ പുരോഗമിക്കുന്നതിനിടയിലാണ് വായ്പ ലഭിക്കില്ലെന്ന് അറിഞ്ഞത്. ഇതോടെ നിരാശനായിരുന്നു. മൂന്നു മാസം മുൻപായിരുന്നു അഭിനന്ദിൻറെ വിവാഹം.