അമിതശബ്ദവുമായി നിരത്തിലോടിയ 770 വാഹനങ്ങൾക്ക് അബുദാബിയിൽ പിഴ ചുമത്തി

അബുദാബി: അനുവദനീയമായതിൽ അധികം എൻജിൻ ശബ്ദവുമായി നിരത്തിലോടിയ വാഹനങ്ങൾക്ക് പിഴ ചുമത്തിയതായി അബുദാബി പോലീസ് ഗതാഗതവകുപ്പ് അറിയിച്ചു. 2000 ദിർഹം പിഴയും 12 ബ്ലാക്ക് പോയിന്റുമാണ് അമിതശബ്ദമുണ്ടാക്കുന്ന വാഹന ഉപയോക്താക്കൾക്കുള്ള ശിക്ഷ. 770 വാഹനങ്ങളിന്മേലാണ് ഇത്തരത്തിൽ പിഴ ചുമത്തിയത്.

അനുവദനീയമായതിൽ അധികം മോടിപിടിപ്പിക്കലുകൾ വാഹനങ്ങളിൽ നടത്തുന്നത് മറ്റുള്ളവരുടെ സുഖകരമായ യാത്രകൾക്ക് വലിയ തടസ്സമാണുണ്ടാക്കുന്നതെന്നും കുട്ടികൾക്കും മുതിർന്നവർക്കും ഇത് വലിയ അസ്വസ്ഥതയുണ്ടാക്കുന്നുവെന്നും പോലീസ് അറിയിച്ചു.

സൈലൻസറുകളിലും എൻജിനിലും മാറ്റംവരുത്തിയാണ് ഇത്തരത്തിൽ അമിതശബ്ദമുണ്ടാക്കുന്നത്. ഇത്തരത്തിലുള്ള വാഹനങ്ങൾ ശ്രദ്ധയിൽപ്പെട്ടാൽ ഉടൻതന്നെ കൺട്രോൾ സെന്ററിൽ 999 എന്ന നമ്പറിൽ വിളിച്ച് വിവരമറിയിക്കണമെന്ന് പോലീസ് അറിയിച്ചു.