സിൽവർലൈൻ സംവാദത്തില്‍ അലോക് വർമയും ശ്രീധർ രാധാകൃഷ്ണനും പങ്കെടുക്കില്ല

തിരുവനന്തപുരം: സിൽവർലൈൻ സംവാദത്തില്‍ സിസ്ട്രയുടെ മുൻ ഡപ്യൂട്ടി പ്രോജക്ട് ഡയറക്ടർ അലോക് വർമയും പരിസ്ഥിതി പ്രവർത്തകൻ ശ്രീധർ രാധാകൃഷ്ണനും പങ്കെടുക്കില്ല. സംവാദം നടത്തുന്നതു സർക്കാർ ആയിരിക്കണം എന്നുള്ള ആവശ്യമാണ് ഇരുവരും ഉന്നയിച്ചിരിക്കുന്നത്. അലോക് വർമ ചീഫ് സെക്രട്ടറിയെ നിലപാടറിയിച്ചു. ശ്രീധർ രാധാകൃഷ്ണന്‍ കെ- റെയിൽ കോർപറേഷനെയാണു സംവാദത്തിൽ പങ്കെടുക്കില്ലെന്ന് അറിയിച്ചത്.

സാമൂഹിക നിരീക്ഷകൻ ജോസഫ് സി. മാത്യുവിനെ ആദ്യം സംവാദത്തിനു ക്ഷണിക്കുകയും പിന്നീടു കാരണം വിശദീകരിക്കാതെ ഒഴിവാക്കുകയും ചെയ്തതിനോടുള്ള അതൃപ്തിയും ഇരുവര്‍ക്കുമുണ്ട്. കെ- റെയിൽ കോർപറേഷനാണ് സംവാദത്തിനുള്ള ക്ഷണ കത്ത് നല്‍കിയത്. ക്ഷണക്കത്തിലെ ചില പരാമര്‍ശങ്ങളോടു യോജിക്കാനാകില്ലെന്നും അലോക് വർമയും ശ്രീധർ രാധാകൃഷ്ണനും പറഞ്ഞു.

കെ- റെയില്‍ കോർപറേഷൻ സിൽവർലൈൻ പദ്ധതിയുടെ ഗുണങ്ങൾ ആളുകളെ പറഞ്ഞു മനസ്സിലാക്കുന്ന ഒരു സംവാദമാണ് ഇതെന്നു തോന്നിപ്പിക്കുന്ന ചില വാചകങ്ങളും പദപ്രയോഗങ്ങളും കത്തിലുണ്ട്. തുറന്ന ഒരു സംവാദമാണെങ്കില്‍ മാത്രമേ ഇതിൽ പങ്കെടുക്കൂവെന്ന് ഇരുവരും നേരത്തേ നിലപാടെടുത്തിരുന്നു.