കൊവിഡ് 19; 10,000 ട്രെയിനികളെ ഒഴിവാക്കാന്‍ തീരുമാനിച്ച് ഇന്‍ഫോസിസ്

മൈസൂരു: രാജ്യത്ത് കൊവിഡ് 19 വ്യാപിക്കുന്ന സാഹചര്യത്തില്‍ മൈസൂരുവിലെയും ഓഫീസില്‍ കടുത്ത നിയന്ത്രണങ്ങളേര്‍പ്പെടുത്താന്‍ ഐ.ടി മേഖലയിലെ പ്രമുഖ കമ്പനിയായ ഇന്‍ഫോസിസ്. കമ്പനിയുടെ മൈസൂരുവിലുള്ള ഗ്ലോബല്‍ എഡ്യുക്കേഷന്‍ സെന്ററില്‍നിന്നും 10,000 ട്രെയിനികളെ ഒഴിവാക്കാനാണ് തീരുമാനം. കൊവിഡ് ഭീഷണയില്‍ ഇന്ത്യയിലെ ഏറ്റവും വലിയ ആളെ ഒഴിപ്പിക്കലാണിത്.

ഒഴിപ്പിക്കുന്ന ട്രെയിനികളെ അതത് കേന്ദ്രങ്ങളിലെത്തിക്കാന്‍ കര്‍ണാടക സ്റ്റേറ്റ് റോഡ് ട്രാന്‍സ്‌പോര്‍ട്ടിന്റെ സഹായവും കമ്പനി ആവശ്യപ്പെട്ടിട്ടുണ്ട്. രാജ്യത്തെ വിവിധ സംസ്ഥാനങ്ങളിലുള്ളവരാണ് ഈ ട്രെയിനികള്‍. ഇവരെ വീടുകളില്‍ സുരക്ഷിതരായി എത്തിക്കാന്‍ കര്‍ണാടക ആര്‍.ടി.സി വലിയ ക്രമീകരണങ്ങളാണ് നടത്തിയിരിക്കുന്നത്.

21 ബസുകള്‍ ഇതിനായി വിട്ടുനല്‍കിയിട്ടുണ്ടെന്ന് അധികൃതര്‍ അറിയിച്ചു. തിരുവനന്തപുരം, ചെന്നൈ, ബെംഗളൂരു, പൂനെ, കോട്ടയം ഹൈദരാബാദ് എന്നിവിടങ്ങളിലേക്ക് ബസില്‍തന്നെ ആളുകളെ എത്തിക്കുമെന്നും അധികൃതര്‍ കൂട്ടിച്ചേര്‍ത്തു.

ബുധനാഴ്ച വൈകീട്ടോടെ 434 ല്‍ അധികം ട്രെയിനികള്‍ വീട്ടിലേക്ക് മടങ്ങാന്‍ തയ്യാറെടുപ്പുകള്‍ എടുത്തുകഴിഞ്ഞു. രാജ്യത്ത് പല കമ്പനികളും ജാഗ്രതാ നിര്‍ദ്ദേശങ്ങള്‍ ഉള്‍ക്കൊണ്ട് തൊഴിലാളികളെ ഒഴിപ്പിച്ചുകൊണ്ടിരിക്കുകയാണ്. ഇന്‍ഫോസിസിന്റെ ബെംഗളൂരുവിന്റെ ഓഫീസില്‍നിന്നും തൊഴിലാളികളെ ഒഴിപ്പിച്ചിരുന്നു.