പമ്പിലെത്തുന്ന “ശ്രീജേഷ്” എന്ന പേരുള്ളവർക്ക് പെട്രോളും ഡീസലും സൗജന്യം; പി.ആർ ശ്രീജേഷിന് ഒരു വ്യത്യസ്ത ആദരം

തിരുവനന്തപുരം: ഒളിമ്പിക്സ് ജേതാവ് പി.ആർ ശ്രീജേഷിന് വ്യത്യസ്തമായി ഒരു ആദരവുമായി രംഗത്തെത്തിയിരിക്കുയാണ് തിരുവനന്തപുരത്തെ കാഞ്ഞിരംപാറയിലെ ഹരേ കൃഷ്ണ എന്ന പെട്രോൾ പമ്പിന്റെ ഉടമ. പി.ആർ ശ്രീജേഷിന് ആദര സൂചകമായി പമ്പിലെത്തുന്ന ശ്രീജേഷ് എന്ന് പേരുള്ള എല്ലാവർക്കും പെട്രോളും ഡീസലും സൗജന്യമായി നൽകുമെന്നാണ് പെട്രോൾ പമ്പുടമ അറിയിച്ചിരിക്കുന്നത്. പമ്പിലെത്തുന്നവർ പേര് ശ്രീജേഷാണ് എന്ന് തെളിയിക്കുന്ന ഐഡി കാണിച്ചാൽ ആർക്കും 101 രൂപയുടെ പെട്രോൾ അല്ലെങ്കിൽ ഡീസൽ സൗജന്യമായി നൽകു൦.

ഓഗസ്റ്റ് 31 വരെ ഈ ഓഫർ തുടരും. ഒരാഴ്ചയിൽ ഒരു പ്രാവശ്യമാണെന്നും അടുത്ത ആഴ്ച അയാൾക്ക് വീണ്ടും വരാ൦. നിരവധി പേർ ഇതിനകം തന്നെ എത്തി പെട്രോൾ അടിച്ചു കഴിഞ്ഞുവെന്ന് പമ്പുടമ സുരേഷ് പറയുന്നു.