യുഎഇ വിസ പുതുക്കലിനുള്ള അവസാന സമയപരിധി ഒക്ടോബർ 11ന്

മാർച്ച് ഒന്നിനും ജൂലൈ 11 നും ഇടയിൽ വിസ കാലഹരണപ്പെട്ട എല്ലാ യുഎഇ നിവാസികളും ഒക്ടോബർ 11 നകം പുതുക്കണമെന്ന് യുഎഇ. ഇത്തരക്കാര്‍ നാല്​ ദിവസത്തിനുള്ളില്‍ രാജ്യംവിടുകയോ വിസ പുതുക്കുകയോ ചെയ്യണം. അല്ലാത്തപക്ഷം പിന്നീട് യുഎഇയില്‍ തങ്ങുന്ന ഓരോ ദിവസത്തിനും പിഴ നല്‍കേണ്ടി വരുമെന്ന് അധികൃതര്‍ മുന്നറിയിപ്പ് നല്‍കി.

കൊറോണ വൈറസ് ബാധിച്ചവരെ പിന്തുണച്ച് ജൂലൈയിൽ മന്ത്രിസഭ ജിസിസി പാസ്‌പോർട്ട് ഉടമകൾക്കും യുഎഇ നിവാസികൾക്കും വിസ, റെസിഡൻസി രേഖകൾ പുതുക്കുന്നതിന് മൂന്ന് മാസത്തെ ഗ്രേസ് പിരീഡ് പ്രഖ്യാപിച്ചിരുന്നു. വിമാന മാര്‍ഗങ്ങള്‍ ഇല്ലായതോടെ എങ്ങനെ നാടണയുമെന്ന്​ വിഷമിച്ചവർക്കു​ ഏറെ ആശ്വാസമായിരുന്നു ഈ തീരുമാനം.

ഈ മാസം 11ന് ശേഷവും മടങ്ങാത്ത താമസ വിസക്കാര്‍ അധികമായി തങ്ങുന്ന ഓരോ ദിവസവും 25 ദിര്‍ഹം വീതം പിഴ അടക്കേണ്ടി വരുമെന്നും ആറ് മാസം കഴിഞ്ഞാല്‍ ഇത് 50 ദിര്‍ഹമായി ഉയരുമെന്നും യുഎഇ അധികൃതര്‍ അറിയിച്ചു.

അതേസമയം, മാര്‍ച്ച്‌ ഒന്നിന് മുന്‍പ് വിസ കാലാവധി അവസാനിച്ചവര്‍ക്ക് നവംബര്‍ 17 വരെ രാജ്യത്ത് തുടരാം. ഇവര്‍ക്ക് പൊതുമാപ്പിന്‍റെ ആനുകൂല്യമാണ് ലഭിക്കുക.