കൊവിഡ് വ്യാപനം; വീടിനകത്ത് കഴിയുമ്പോഴും മാസ്ക് ധരിക്കണമെന്ന് കേന്ദ്രസർക്കാർ

ന്യൂഡൽഹി: കൊവിഡ് വ്യാപനത്തിന്റെ പശ്ചാത്തലത്തിൽ വീടിനകത്ത് കഴിയുമ്പോഴും മാസ്ക് ധരിക്കണമെന്ന് കേന്ദ്രസർക്കാർ. കേന്ദ്ര ആരോഗ്യവകുപ്പ് ജോയിന്റ് സെക്രട്ടറി ലവ് അഗർവാൾ, നീതി ആയോഗ് അംഗം ഡോ. വി കെ പോൾ, ഡൽഹി എയിംസ് ഡയറക്ടർ ഡോ. രൺദീപ് ഗുലേറിയ എന്നിവർ അടങ്ങുന്ന സംയുക്ത വാർത്താസമ്മേളനത്തിലാണ് ഇക്കാര്യം അറിയിച്ചത്.

ഓക്സിജൻ പ്രതിസന്ധി പരിഹരിക്കാനുള്ള നടപടി ഊര്‍ജിതമാക്കിയതായും ഓക്സിജൻ ഉത്പാദനം വര്‍ദ്ധിപ്പിച്ചതായും ആരോഗ്യമന്ത്രാലയം അറിയിച്ചു. വാക്സിനേഷൻ യുക്തമായ സമയത്ത് സ്വീകരിക്കണമെന്നും ആര്‍ത്തവ ദിനങ്ങള്‍ക്കിടയിലും വാക്സിന്‍ സ്വീകരിക്കാമെന്നും ആരോഗ്യവകുപ്പ് നിർദ്ദേശം നൽകി . നേരിയ ലക്ഷണങ്ങള്‍ മാത്രമുള്ളവർ വീടുകളില്‍ തന്നെ കഴിയാനും നിര്‍ദ്ദേശമുണ്ട്.