അയർലണ്ടിൽ വീണ്ടും ഉഷ്ണതരംഗ മുന്നറിയിപ്പ്; ജല ഉപഭോഗം നിയന്ത്രിക്കാൻ നിർദ്ദേശം

അയർലണ്ടിൽ തുടരുന്ന കടുത്ത ചൂടിനെ തുടർന്ന് Met Éireann വീണ്ടും സ്റ്റാറ്റസ് യെല്ലോ ഉയർന്ന താപനില മുന്നറിയിപ്പ് പ്രഖ്യാപിച്ചു. അതേസമയം, രാജ്യത്തിന്റെ വിവിധ ഭാഗങ്ങളിൽ ജല ഉപഭോഗം കുത്തനെ ഉയർന്ന സാഹചര്യത്തിൽ Uisce Éireann വെള്ളം മിതമായി ഉപയോഗിക്കണമെന്ന് പൊതുജനങ്ങളോടും വ്യാപാര സ്ഥാപനങ്ങളോടും അഭ്യർഥിച്ചു. പുതിയ മുന്നറിയിപ്പ് ക്ലെയർ, കോർക്ക്, കെറി, ലിമറിക്ക്, ടിപ്പററി, ഗോൾവേ, മെയോ, കില്കെന്നി, ലീഷ്, ഓഫലി എന്നീ 10 കൗണ്ടികൾക്കാണ്. ഇത് ഞായറാഴ്ച ഉച്ചയ്ക്ക് 1 മണി മുതൽ തിങ്കളാഴ്ച രാവിലെ 7 മണിവരെ പ്രാബല്യത്തിലായിരിക്കും.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

ഈ പ്രദേശങ്ങളിൽ പകൽ താപനില 27 ഡിഗ്രി സെൽഷ്യസിന് മുകളിലെത്താനും, രാത്രിയിലും 15 ഡിഗ്രി സെൽഷ്യസ് വരെ ചൂട് അനുഭവപ്പെടാനുമാണ് സാധ്യത. ഇതിനിടെ, കാർലോ, കിൽഡെയർ, കില്കെന്നി, ലീഷ്, ലോങ്ഫോർഡ്, മീത്ത്, ഓഫലി, വെസ്റ്റ്മീത്ത്, വെക്സ്ഫോർഡ്, കോർക്ക്, ലിമറിക്ക്, ടിപ്പററി, വാട്ടർഫോർഡ് എന്നീ 13 കൗണ്ടികളിൽ നിലവിലുള്ള സ്റ്റാറ്റസ് യെല്ലോ മുന്നറിയിപ്പ് ഞായറാഴ്ച രാവിലെ 7 മണിവരെ തുടരും. ചില പ്രദേശങ്ങളിൽ താപനില 30 ഡിഗ്രി സെൽഷ്യസ് വരെ ഉയരാനിടയുണ്ടെന്ന് Met Éireann അറിയിച്ചു.

കാലാവസ്ഥാ വകുപ്പിന്റെ മുന്നറിയിപ്പുപ്രകാരം ഈ ഉഷ്ണതരംഗം അടുത്ത ആഴ്ചയും തുടരും. ഉയർന്ന താപനില കാരണം ഹീറ്റ് സ്ട്രെസ്, രാത്രിയിൽ അസ്വസ്ഥമായ ഉറക്കം, തടാകങ്ങളിലും കടൽത്തീരങ്ങളിലും അപകടസാധ്യത, കൂടാതെ കാട്ടുതീ പടരാനുള്ള സാധ്യതയും വർധിക്കുമെന്ന് മുന്നറിയിപ്പുണ്ട്. തുടർച്ചയായ ചൂടിനെ തുടർന്ന് ജല ഉപഭോഗം വൻതോതിൽ ഉയർന്നതായി Uisce Éireann അറിയിച്ചു. കോലി ഉപദ്വീപ്, വെസ്റ്റ് കോർക്ക്, നോർത്ത് കോർക്കിന്റെ ചില ഭാഗങ്ങൾ, ഗ്രേറ്റർ ഡബ്ലിൻ, സൗത്ത് ലെട്രിം, ടിപ്പററി എന്നീ ആറു മേഖലകളിലായി ഏകദേശം 25 ലക്ഷം ജനങ്ങളോട് വെള്ളം മിതമായി ഉപയോഗിക്കണമെന്ന് അധികൃതർ ആവശ്യപ്പെട്ടു.

തോട്ടങ്ങളിൽ അമിതമായി വെള്ളമൊഴിക്കൽ, പവർ ഹോസിംഗ്, മറ്റ് പുറംവശ ജല ഉപയോഗങ്ങൾ എന്നിവയാണ് ജല ഉപഭോഗം വർധിക്കാൻ പ്രധാന കാരണങ്ങളെന്ന് Uisce Éireann വ്യക്തമാക്കി. ഇതുമൂലം ചില ദിവസങ്ങളിൽ റിസർവോയറുകളിലെ ജലനിരപ്പ് 30 ദശലക്ഷം ലിറ്റർ വരെ കുറയുന്നതായും അറിയിച്ചു. ജല ഉപയോഗം നിയന്ത്രിക്കാനായില്ലെങ്കിൽ ഗ്രേറ്റർ ഡബ്ലിൻ മേഖലയിലുൾപ്പെടെ രാത്രികാല ജലവിതരണ നിയന്ത്രണങ്ങൾ ഏർപ്പെടുത്തേണ്ട സാഹചര്യം ഉണ്ടായേക്കാമെന്നും അധികൃതർ മുന്നറിയിപ്പ് നൽകി. അത്യാവശ്യ ആവശ്യങ്ങൾക്കായി മാത്രം വെള്ളം ഉപയോഗിക്കുകയും അനാവശ്യ ജല ഉപയോഗം ഒഴിവാക്കുകയും ചെയ്യണമെന്ന് പൊതുജനങ്ങളോട് വീണ്ടും അഭ്യർഥിച്ചിട്ടുണ്ട്.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==