ശ്രീലങ്കൻ ക്യാംപിൽ കോവിഡ്; ഇന്ത്യ– ശ്രീലങ്ക പരമ്പര 5 ദിവസം നീട്ടിവച്ചു

ന്യൂഡൽഹി∙ ശ്രീലങ്കൻ ക്യാംപിൽ കോവിഡ് സ്ഥിരീകരിച്ചതിനെത്തുടർന്ന് ഈ മാസം 13നു തുടങ്ങാൻ നിശ്ചയിച്ചിരുന്ന പരമ്പര 18നാകും തുടങ്ങുകയെന്നു ബിസിസിഐ സെക്രട്ടറി ജയ് ഷാ അറിയിച്ചു. മൂന്ന് ഏകദിനങ്ങളും 3 ട്വന്റി20 മത്സരങ്ങളുമാണു പരമ്പരയിൽ ഉള്ളത്. ഇന്നാണു തീയതിയുടെ കാര്യത്തിൽ ഔദ്യോഗിക പ്രഖ്യാപനം ഉണ്ടായത്.

18,20,23 തീയതികളിൽ ഏകദിന മത്സരങ്ങൾ നടക്കും. പ്രേമദാസ സ്റ്റേഡിയമാണു വേദി. ശ്രീലങ്കൻ ബാറ്റിങ് കോച്ച് ഗ്രാന്റ് ഫ്ലവർ, ഡാറ്റാ അനലിസ്റ്റ് ജി.ടി. നിരോഷൻ എന്നിവർ വെള്ളിയാഴ്ച കോവിഡ് പോസ്റ്റീവായതിനെത്തുടർന്നാണു പരമ്പര നീട്ടിവയ്ക്കേണ്ടിവന്നത്. ഇരുവർക്കും കോവിഡ് സ്ഥിരീകരിച്ചതോടെ ടീമിലെ മറ്റ് അംഗങ്ങളുടെ ക്വാറന്റീൻ കാലാവധിയും ദീർഘിപ്പിക്കേണ്ടിവന്നു.