‘ആനാവൂർ നാഗപ്പന് ഭരിക്കാൻ മേയറെ റബ്ബർ സ്റ്റാമ്പാക്കി’; കെ.മുരളീധരൻ

തിരുവനന്തപുരം മേയർ ആര്യ രാജേന്ദ്രനെതിരെ കെ മുരളീധരൻ. ആനാവൂർ നാഗപ്പന് ഭരിക്കാനാണ് മേയറെ റബ്ബർ സ്റ്റാമ്പാക്കിയതെന്ന് കെ മുരളീധരൻ പറഞ്ഞു. ഇത് പറയുമ്പോൾ തനിക്കെതിരെ വക്കീൽ നോട്ടീസ് വന്നേക്കും, എന്നാലും തുറന്നുപറയുമെന്നും മുരളീധരൻ പറഞ്ഞു.

നഗരസഭയുമായി ബന്ധപ്പെട്ട് പുറത്തുവന്ന കത്ത് വ്യാജമാണെങ്കിൽ അതാരുണ്ടാക്കി എന്നുകണ്ടെത്തണം. എൽഡിഎഫ് രാജ്ഭവനെതിരായി നടത്തിയ മാർച്ചിനെയും കെ മുരളീധരൻ വിമർശിച്ചു. വെള്ളായണി പരമു ഇത്തിക്കരപ്പക്കിക്കെതിരെ സമരം ചെയ്ത പോലെയാണ് എൽഡിഎഫിന്റെ രാജ്ഭവൻ സമരം. രണ്ടുപേരും കളളന്മാരാണ്. ഒരാൾ കാവിവത്ക്കരണം നടത്താനും മറ്റേയാൾ മാർക്സിസ്റ്റ് വത്ക്കരണം നടത്താനുമാണ് ശ്രമിക്കുന്നത്. ഇത് രണ്ടും അനുവദിക്കില്ലെന്നാണ് യുഡിഎഫ് നിലപാടെന്നും കെ മുരളീധരൻ പറഞ്ഞു.

അതേസമയം ഗവർണർ സർക്കാർ വിഷയത്തിലും മുരളീധരൻ പ്രതികരിച്ചു. ഒരു വിദഗ്ധൻ ചാൻസലർ ആവുമ്പോൾ മന്ത്രിമാർ എങ്ങനെ പ്രൊ ചാൻസലർ ആയി പിന്നിലിരിക്കുമെന്ന് മുരളീധരൻ പരിഹസിച്ചു. സർക്കാർ ധൂർത്ത് നടത്തുകയാണ്. ധൂർത്തിന് കാശുള്ള സർക്കാരിന് ശമ്പളപരിഷ്കരണത്തിന് കാശില്ല. മന്ത്രിമാർക്ക് പുതിയ കാറുകൾ വാങ്ങുന്നു, സഖാക്കളെ ഡ്രൈവർമാരെ ഡ്രൈവർമാരാക്കുന്നു. വണ്ടി പഠിക്കുന്നത് വരെ ഈ കാറിലായിരിക്കും. എന്നിട്ട്, എവിടെയെങ്കിലും കൊണ്ട് ചാർത്തും, വേറെ വണ്ടിവാങ്ങും’. മുരളീധരൻ കുറ്റപ്പെടുത്തി.