ഡാൻസ് ബാറിലെ രഹസ്യഅറയിൽ ഒളിപ്പിച്ചിരുന്ന 17 സ്ത്രീകളെ രക്ഷപ്പെടുത്തി മുംബൈ പോലീസ്

മുംബൈയിലെ അന്ധേരിയിലെ ഡാൻസ് ബാറിൽ നടത്തിയ റെയ്ഡിൽ മേക്കപ്പ് റൂമുമായി ബന്ധപ്പെടുത്തിയ രഹസ്യഅറയിൽ ഒളിപ്പിച്ചിരുന്ന 17 സ്ത്രീകളെ രക്ഷപ്പെടുത്തിയതായി പോലീസ് അറിയിച്ചു. ഈ മുറിയുടെ പരിസരത്ത് സ്ഥാപിച്ചിട്ടുള്ള ഒരു നൂതന ഇലക്ട്രോണിക് സംവിധാനത്തിന്റെ സഹായത്തോടെ റെയ്ഡ് സംബന്ധിച്ച് മുന്നറിയിപ്പ് ലഭിച്ചതിനെ തുടർന്ന് ഡാൻസ് ബാർ ഉദ്യോഗസ്ഥർ സ്ത്രീകളെ ഒളിപ്പിച്ചതായാണ് വിവരം.

ഉപഭോക്താക്കൾക്ക് മുന്നിൽ സ്ത്രീകളെ നൃത്തം ചെയ്യാൻ പ്രേരിപ്പിക്കുന്നുണ്ടെന്ന രഹസ്യവിവരം ലഭിച്ചതിനെ തുടർന്ന് അന്ധേരിയിലെ ദീപ ബാറില്‍ ശനിയാഴ്ചയാണ് പോലീസ് പരിശോധന നടത്തിയത്. പോലീസ് എത്തി തിരച്ചിൽ നടത്തിയെങ്കിലും ഒളിപ്പിച്ചിരുന്ന പെൺകുട്ടികളെ ആദ്യം കണ്ടെത്താനായില്ല.

പിന്നീടാണ് മേക്കപ്പ് മുറിയിലെ വമ്പന്‍ കണ്ണാടി പോലീസുകാരുടെ ശ്രദ്ധയില്‍പെട്ടത്. കണ്ണാടി വളരെ തന്ത്രപരമായി ഘടിപ്പിച്ചിരിക്കുന്നതിനാൽ ഭിത്തിയിൽ നിന്ന് കണ്ണാടി നീക്കം ചെയ്യാനുള്ള ശ്രമം പരാജയപ്പെട്ടു.

കണ്ണാടി ചുറ്റിക കൊണ്ടു പൊട്ടിച്ചപ്പോൾ രഹസ്യ അറയിലേക്കുള്ള വഴി കണ്ടെത്തുകയും എസിയും കിടക്കകളും ഉള്‍പ്പെടെ എല്ലാ സജ്ജീകരണങ്ങളും ഒരുക്കിയിരിക്കുന്ന രഹസ്യ അറയിൽ നിന്ന് 17 സ്ത്രീകളെ രക്ഷിക്കുകയും ചെയ്തു. ബാര്‍ ഉടമകള്‍ക്കെതിരെ പോലീസ് കേസെടുത്തു.