പാക്കിസ്ഥാനിൽ ക്രൈസ്തവ വൈദികൻ കൊല്ലപ്പെട്ടു

പെഷാവർ: പാക്കിസ്ഥാനിലെ പെഷാവർ നഗരപ്രാന്തത്തിലെ ഗുൽബഹറിൽ ക്രൈസ്തവ പുരോഹിതൻ അക്രമികളുടെ വെടിയേറ്റു മരിച്ചു. ഞായറാഴ്ച ആരാധനയ്ക്കു ശേഷം മടങ്ങുകയായിരുന്ന ഓൾ സെയിന്റ്സ് ചർച്ചിലെ റവ. വില്യം സിറാജാണ് കൊല്ലപ്പെട്ടത്. കാറിൽ കൂടെയുണ്ടായിരുന്ന റവ. നയീം പാട്രിക്കിനെ പരുക്കുകളോടെ ആശുപത്രിയിൽ പ്രവേശിപ്പിച്ചു. ഒരു സംഘടനയും ആക്രമണത്തിന്റെ ഉത്തരവാദിത്തം ഏറ്റിട്ടില്ല.

ചർച്ച് ഓഫ് പാക്കിസ്ഥാൻ പെഷാവർ രൂപതയിലെ പുരോഹിതർക്കു നേരെയാണ് ആക്രമണം നടന്നത്. ആക്രമണത്തെ പെഷാവർ രൂപത ബിഷപ് ആസാദ് മാർഷൽ അപലപിച്ചു.