ഇന്ത്യയിൽ 2 കോവിഡ് പ്രതിരോധ വാക്‌സീനുകള്‍ക്ക് കൂടി അനുമതി

ന്യൂഡൽഹി: ഇന്ത്യയിൽ രണ്ടു കോവിഡ് പ്രതിരോധ വാക്സീനുകൾക്ക് കൂടി അനുമതി. കോർബെവാക്‌സ്, കോവോവാക്‌സ് എന്നീ രണ്ട് വാക്‌സീനുകൾക്കാണ് അനുമതി നൽകിയത്. ഇത് കൂടാതെ ആന്റി വൈറൽ മരുന്നായ മോൾനുപിരാവിറിനും കേന്ദ്രസർക്കാർ അനുമതി നൽകി. അടിയന്തര ഘട്ടത്തിലുള്ള ഉപയോഗത്തിനാണ് അനുമതി നല്‍കിയിരിക്കുന്നത്.

ഇന്ത്യയിലെ ആദ്യത്തെ സ്വദേശീയ “ആർബിഡി പ്രോട്ടീൻ സബ്-യൂണിറ്റ് വാക്സീൻ ആണ് കോർബെവാക്സ്. ഹൈദരാബാദ് ആസ്ഥാനമായുള്ള ബയോളജിക്കൽ-ഇ എന്ന സ്ഥാപനമാണ് ഇത് നിർമ്മിച്ചിരിക്കുന്നത്. ഇന്ത്യയിൽ വികസിപ്പിച്ച മൂന്നാമത്തെ വാക്സീനാണിതെന്ന് കേന്ദ്ര ആരോഗ്യമന്ത്രി മന്‍സുഖ് മാണ്ഡവ്യ പറഞ്ഞു. അടിയന്തര സാഹചര്യങ്ങളിൽ കോവിഡ് ബാധിച്ച മുതിർന്നവരിൽ നിയന്ത്രിതമായി ഉപയോഗിക്കാൻ ആന്റി-വൈറൽ മരുന്നായ മോൽനുപിറാവിർ ഇന്ത്യയിൽ നിർമിക്കും. 13 കമ്പനികൾ ചേർന്നാണ് മരുന്ന് നിർമ്മിക്കുന്നതെന്ന് മന്ത്രി പറഞ്ഞു.