ലോക്ക് ഡൗണിൽ കേന്ദ്ര സർക്കാരിനെതിരെ വിമർശനവുമായി കോൺ​ഗ്രസ് നേതാവ് രാഹുൽ ​ഗാന്ധി

ന്യൂദൽഹി: ലോക്ക് ഡൗണിൽ കേന്ദ്ര സർക്കാരിനെതിരെ വിമർശനവുമായി കോൺ​ഗ്രസ് നേതാവ് രാഹുൽ ​ഗാന്ധി. ലോക്ക് ഡൗൺ ഇങ്ങനെ തുടർന്നാൽ ശരിയാകില്ലെന്നും നടപടികളിൽ സുതാര്യത ഉറപ്പാക്കണമെന്നും രാഹുൽ ​ഗാന്ധി പറഞ്ഞു.

ജനത്തിന് സഹായമെത്തിക്കാതെയുള്ള ലോക്ക് ഡൗൺ ദുരന്തമാകുമെന്നും വിവിധ സംസ്ഥാനങ്ങളിൽ ജോലി ചെയ്യുന്ന അതിഥി തൊഴിലാളികൾക്ക് സഹായം നൽകണമെന്നും രാഹുൽ ​ഗാന്ധി കൂട്ടിച്ചേർത്തു.

”സർക്കാർ ഈ ഘട്ടത്തിലെങ്കിലും കുറച്ച് സുതാര്യത ഉറപ്പാക്കണം. എപ്പൊഴാണ് രാജ്യം തുറന്ന് പ്രവർത്തിക്കുക എന്ന് ഞങ്ങൾക്ക് അറിയേണ്ടതുണ്ട്. ഇടയ്ക്ക് തുറന്നും അടച്ചും കളിക്കാൻ ലോക്ക് ഡൗൺ ഒരു താക്കോലൊന്നുമല്ല .” . രഹുൽ പറഞ്ഞു.

നേരത്തെ കോൺ​ഗ്രസ് നേതാവ് സോണിയ ​ഗാന്ധി ഉൾപ്പെടെയുള്ളവർ കേന്ദ്ര സർക്കാരിനെതിരെ വിമർശനവുമായി രം​ഗത്തെത്തിയിരുന്നു. നാട്ടിലേക്ക് മടങ്ങുന്ന അതിഥി തൊഴിലാളികളിൽ നിന്ന് ടിക്കറ്റ് ചാർജ് ഈടാക്കുന്ന കേന്ദ്ര നടപടിക്കെതിരെയാണ് കോൺ​ഗ്രസ് വിമർശനം ഉന്നയിച്ച് രം​ഗത്തെത്തിയത്. സഹായം ആവശ്യമുള്ള തൊഴിലാളികൾക്ക് കോൺ​ഗ്രസ് ടിക്കറ്റ് എടുത്തു നൽകുമെന്നും സോണിയ വ്യക്തമാക്കിയിരുന്നു.

നേരത്തെ ലോക്ക് ഡൗണിന്റെ ഭാരം സഹായമൊന്നും നൽകാതെ സംസ്ഥാന സർക്കാരുകളുടെ മേൽ കേന്ദ്രം കെട്ടിവയ്ക്കുകയാണെന്ന് മുതിർന്ന കോൺ​ഗ്രസ് നേതാക്കൾ പറഞ്ഞിരുന്നു. ഈ പശ്ചാത്തലത്തിൽ സോണിയ ​ഗാന്ധിയുടെ നേതൃത്വത്തിൽ കോൺ​ഗ്രസ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാർക്ക് വേണ്ടി പ്രത്യേക യോ​ഗവും സംഘടിപ്പിച്ചിരുന്നു. പ്രസ്തുത യോ​ഗത്തിൽ ലോക്ക് ഡൗണിന് ശേഷം എന്താണ് കേന്ദ്രത്തിന്റെ പദ്ധതിയെന്ന് സോണിയയും മൻമോഹൻ സിങും ഉൾപ്പെടയുള്ളവർ ആരാഞ്ഞിരുന്നു.