ദുബായിൽ തൊഴിലാളികൾ സഞ്ചരിച്ച ബസും ലോറിയും കൂട്ടിയിടിച്ച് നാലു മരണം

ദുബായ്: ദുബായിൽ തൊഴിലാളികൾ സഞ്ചരിച്ച ബസും ലോറിയും കൂട്ടിയിടിച്ച് നാലു പേർ മരിക്കുകയും 11 പേർക്ക് പരുക്കേൽക്കുകയും ചെയ്തു. എമിറേറ്റ്സ് റോഡിൽ ഇന്നലെ വൈകിട്ട് 7.10നായിരുന്നു അപകടമെന്ന് പൊലീസ് പറഞ്ഞു. പരുക്കേറ്റവരിൽ ഒരാളുടെ നില ഗുരുതരമാണ്. രണ്ടു പേർക്ക് സാരമായ പരുക്കേറ്റു. എട്ടു പേരുടെ പരുക്ക് നിസാരമാണ്.

പാതയുടെ മൂന്നാം ലൈനിൽ ബ്രേയ്ക്ക് ഡൗണായ ലോറി ഡ്രൈവർ മാറ്റാൻ ശ്രമിക്കുന്നതിനിടെ തൊഴിലാളികളുമായെത്തിയ ബസ് ഇടിക്കുകയായിരുന്നുവെന്ന് ദുബായ് ട്രാഫിക് പൊലീസ് ഡയറക്ടർ ബ്രി.സെയ്ഫ് മുഹൈർ ്ൽ മസ്റൂയി പറഞ്ഞു.

ഉടൻ സ്ഥലത്തെത്തിയ പൊലീസ് രക്ഷാപ്രവർത്തനം നടത്തി. പരുക്കേറ്റവരെ ഉടൻ റാഷിദ് ആശുപത്രിയിലെത്തിച്ചു. മരിച്ചവരെയും പരുക്കേറ്റവരെയും കുറിച്ചുള്ള കൂടുതൽ വിവരങ്ങൾ പൊലീസ് പുറത്തുവിട്ടിട്ടില്ല.