പലിശനിരക്കിൽ മാറ്റമില്ല; പണപ്പെരുപ്പ ഭീഷണി നിരീക്ഷിച്ച് ECB

യൂറോസോണിലെ പലിശനിരക്കുകളിൽ മാറ്റമില്ലാതെ തുടരാൻ യൂറോപ്യൻ സെൻട്രൽ ബാങ്ക് (ECB) തീരുമാനിച്ചു. എന്നാൽ ഇറാൻ-മിഡിൽ ഈസ്റ്റ് സംഘർഷത്തെ തുടർന്നുള്ള ഊർജവില വർധനയും അതിന്റെ പണപ്പെരുപ്പത്തെ ബാധിക്കുന്ന സാധ്യതയും ബാങ്ക് സൂക്ഷ്മമായി നിരീക്ഷിക്കുകയാണെന്ന് അധികൃതർ വ്യക്തമാക്കി.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

കഴിഞ്ഞ മാസം പലിശനിരക്ക് ഉയർത്തിയിരുന്ന ECB, കൂടുതൽ വർധനവിന് സാധ്യതയുണ്ടെന്ന് സൂചന നൽകിയിരുന്നു. എന്നാൽ പിന്നീട് പുറത്തുവന്ന സാമ്പത്തിക കണക്കുകൾ താരതമ്യേന അനുകൂലമായതോടെ ഈ മാസം നിരക്കിൽ മാറ്റം വരുത്തേണ്ടതില്ലെന്ന തീരുമാനത്തിലേക്ക് ബാങ്ക് എത്തുകയായിരുന്നു. അതേസമയം, ഇറാൻ സംഘർഷം രൂക്ഷമായതോടെ അന്താരാഷ്ട്ര വിപണിയിൽ ക്രൂഡ് ഓയിൽ വില വീണ്ടും ബാരലിന് 100 ഡോളറിന് മുകളിലെത്തിയത് ആശങ്ക വർധിപ്പിക്കുന്നതായി ECB വിലയിരുത്തി.

ഊർജവിലയാണ് പ്രധാന ആശങ്ക

നിലവിലെ ഊർജവില ജൂണിലെ ECB പ്രവചനങ്ങളുമായി പൊരുത്തപ്പെടുന്നുണ്ടെങ്കിലും, മിഡിൽ ഈസ്റ്റ് സംഘർഷത്തിന് മുമ്പുണ്ടായിരുന്നതിനേക്കാൾ വളരെ ഉയർന്ന നിലയിലാണ്. ഊർജവിലയിലെ ഈ വർധന മറ്റ് ഉൽപ്പന്നങ്ങളുടെയും സേവനങ്ങളുടെയും വിലയും ഉയർത്താൻ സാധ്യതയുള്ളതിനാൽ സ്ഥിതിഗതികൾ അടുത്തറിയുമെന്ന് ECB അറിയിച്ചു.

പണപ്പെരുപ്പം ഇടക്കാലത്ത് 2 ശതമാനത്തിന് സമീപം നിലനിർത്തുക എന്ന ലക്ഷ്യത്തിൽ ബാങ്ക് ഉറച്ചുനിൽക്കുന്നതായും, ഭാവിയിലെ പലിശനിരക്ക് തീരുമാനങ്ങൾ ഓരോ യോഗത്തിലും ലഭിക്കുന്ന സാമ്പത്തിക വിവരങ്ങളുടെ അടിസ്ഥാനത്തിലായിരിക്കുമെന്നും വ്യക്തമാക്കി.

നിലവിലെ ECB പലിശനിരക്കുകൾ

• Main Refinancing Rate: 2.40%
• Deposit Facility: 2.25%
• Marginal Lending Facility: 2.65%

2023-ൽ 4.5 ശതമാനത്തിലെത്തിയിരുന്ന പലിശനിരക്കുകളിൽ നിന്ന് പിന്നീട് ഘട്ടംഘട്ടമായി കുറവുണ്ടായിട്ടുണ്ട്.

ലഗാർഡ്: ആവശ്യമെങ്കിൽ വീണ്ടും വർധിപ്പിക്കും

ECB പ്രസിഡന്റ് ക്രിസ്റ്റിൻ ലഗാർഡ് വാർത്താസമ്മേളനത്തിൽ, ഈ മാസത്തെ യോഗത്തിൽ ചില അംഗങ്ങൾ പലിശനിരക്ക് ഉയർത്തണമെന്ന അഭിപ്രായം മുന്നോട്ടുവെച്ചതായി വെളിപ്പെടുത്തി. ഊർജവില ഇനിയും ഉയർന്നുനിൽക്കുകയാണെങ്കിൽ അതിന്റെ പ്രത്യാഘാതം മറ്റ് മേഖലകളിലേക്കും വ്യാപിച്ച് പണപ്പെരുപ്പം വീണ്ടും ശക്തമാകാൻ സാധ്യതയുണ്ടെന്ന് അവർ മുന്നറിയിപ്പ് നൽകി.

അതേസമയം, യൂറോസോണിൽ തൊഴിലവസരങ്ങൾ, വ്യവസായ പ്രവർത്തനം, പ്രതിരോധ മേഖലയിലെ നിക്ഷേപ പദ്ധതികൾ തുടങ്ങിയ മേഖലകളിൽ അനുകൂല സൂചനകൾ ലഭിക്കുന്നുണ്ടെന്നും ലഗാർഡ് ചൂണ്ടിക്കാട്ടി.

പണപ്പെരുപ്പത്തിൽ നേരിയ ആശ്വാസം

യൂറോസോണിലെ പണപ്പെരുപ്പം മേയിലെ 3.2 ശതമാനത്തിൽ നിന്ന് ജൂണിൽ 2.8 ശതമാനമായി കുറഞ്ഞു. എന്നാൽ ഊർജമേഖലയിലെ പണപ്പെരുപ്പം ഇപ്പോഴും ഉയർന്ന നിലയിലാണ്. അതിനാൽ ഭാവിയിൽ പലിശനിരക്ക് വീണ്ടും ഉയർത്തേണ്ട സാഹചര്യം ഉണ്ടാകാമെന്ന സൂചനയാണ് ECB നൽകുന്നത്.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==