ടിപ്പററിയിലെ കാട്ടുതീ: പുക കോർക്കിലേക്കും വ്യാപിക്കുന്നു

അയർലണ്ടിലെ ടിപ്പററി കൗണ്ടിയിലെ സ്ലീവ്നമൺ (Slievenamon) മലനിരകളിൽ കഴിഞ്ഞ തിങ്കളാഴ്ച ആരംഭിച്ച കാട്ടുതീ കൂടുതൽ വ്യാപിച്ചതോടെ അധികൃതർ ജാഗ്രതാ നിർദേശം പുറപ്പെടുവിച്ചു. കാറ്റിന്റെ ദിശ മാറിയതിനെ തുടർന്ന് തീ സമീപത്തെ കോയ്ല്റ്റെ (Coillte) വനമേഖലയിലേക്കും പടർന്നതായാണ് ടിപ്പററി കൗണ്ടി കൗൺസിൽ അറിയിച്ചത്. ഇതോടെ തീ നിയന്ത്രണവിധേയമാക്കാനും കൂടുതൽ വ്യാപിക്കുന്നത് തടയാനുമായി അഗ്നിരക്ഷാസേന, കോയ്ല്റ്റെ അധികൃതർ, മറ്റ് അടിയന്തര സേവന വിഭാഗങ്ങൾ എന്നിവർ സംയുക്തമായി ശക്തമായ രക്ഷാപ്രവർത്തനം തുടരുകയാണ്. സാഹചര്യം അനുകൂലമായാൽ ഹെലികോപ്റ്ററുകളുടെ സഹായവും ഉപയോഗിക്കുന്നുണ്ട്.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

നിലവിൽ മനുഷ്യജീവനോ വീടുകൾക്കോ അടിയന്തര ഭീഷണിയില്ലെന്നാണ് അധികൃതരുടെ വിലയിരുത്തൽ. എന്നിരുന്നാലും തീയിൽ നിന്നുള്ള കനത്ത പുക കാറ്റിനൊപ്പം കോർക്ക് ഉൾപ്പെടെയുള്ള സമീപ പ്രദേശങ്ങളിലേക്ക് വ്യാപിക്കുന്നതിനാൽ ജനങ്ങൾ അതീവ ജാഗ്രത പാലിക്കണമെന്ന് മുന്നറിയിപ്പ് നൽകി. പുക എത്തുന്ന പ്രദേശങ്ങളിലെ താമസക്കാർ വീടുകളുടെ ജനലുകളും വാതിലുകളും അടച്ചിടണം. പ്രായമായവരും ശ്വാസകോശ സംബന്ധമായ അസുഖമുള്ളവരും കഴിയുന്നത്ര വീടിനുള്ളിൽ തുടരണമെന്നും ആരോഗ്യവിഭാഗം നിർദേശിച്ചു.

കാട്ടുതീ പടരുന്ന മേഖലയിലേക്ക് അനാവശ്യ യാത്രകൾ ഒഴിവാക്കണമെന്നും ഡ്രോണുകൾ പറത്തരുതെന്നും അധികൃതർ അഭ്യർഥിച്ചു. ഡ്രോണുകൾ ഉപയോഗിക്കുന്നത് ഹെലികോപ്റ്റർ ഉൾപ്പെടെയുള്ള അഗ്നിശമന പ്രവർത്തനങ്ങളെ തടസപ്പെടുത്തുമെന്ന് അധികൃതർ വ്യക്തമാക്കി. തീപിടിത്തത്തിന്റെ ദിശ മാറാൻ സാധ്യതയുള്ളതിനാൽ അപകടസാധ്യതയുള്ള പ്രദേശങ്ങളിലെ വീടുകൾ അഗ്നിരക്ഷാസേന പ്രത്യേകമായി നിരീക്ഷിക്കുന്നുണ്ട്.

സമീപ പ്രദേശങ്ങളിലെ കർഷകർ കന്നുകാലികളെ സാധ്യമെങ്കിൽ വീടിനുള്ളിലാക്കുകയോ പുക ബാധിക്കാത്ത സുരക്ഷിത സ്ഥലങ്ങളിലേക്ക് മാറ്റുകയോ ചെയ്യണമെന്നും നിർദേശം നൽകിയിട്ടുണ്ട്. കാട്ടുതീ പൂർണമായും നിയന്ത്രണവിധേയമാകുന്നതുവരെ രക്ഷാപ്രവർത്തനം തുടരുമെന്നും സാഹചര്യം അധികൃതർ നിരന്തരം വിലയിരുത്തുകയാണെന്നും ടിപ്പററി കൗണ്ടി കൗൺസിൽ അറിയിച്ചു.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==