മലയാളി യുവാവ് ഷാർജയിൽ കുത്തേറ്റു മരിച്ചു

ഷാർജയിൽ ഇടുക്കി സ്വദേശി കുത്തേറ്റു മരിച്ചു. കരുണാപുരം തടത്തിൽ വീട്ടിൽ വിഷ്ണു വിജയൻ (28) ആണ് കൊല്ലപ്പെട്ടത്. ഷാർജയിലെ അബു ഷഗാരയിൽ നൈജീരിയൻ പൗരൻമാരുടെ ആക്രമണത്തിലാണ് വിഷ്ണു കൊല്ലപ്പെട്ടത് എന്നാണ് പ്രാഥമിക നിഗമനം.

ഷാർജയിൽ ജെന്റ്സ് ബ്യൂട്ടി പാർലറിൽ ജീവനക്കാരനായി ജോലി ചെയ്തു വരികയായിരുന്നു വിഷ്ണു. ഇന്നലെ വൈകീട്ട് വിഷ്ണു താമസിച്ചിരുന്ന ഫ്ലാറ്റിൽ നൈജീരിയക്കാർ തമ്മിൽ വാക്കേറ്റമുണ്ടായിരുന്നു. ഇതിനിടെ തടസം പിടിക്കാനെത്തിയ വിഷ്ണുവിനു കുത്തേൽക്കുകയായിരുന്നു.

ഗുരുതരമായി പരിക്കേറ്റ വിഷ്ണുവിനെ ഫ്ലാറ്റിന്റെ മുകളിൽ നിന്ന് അപകട മരണമാണെന്ന് വരുത്തിത്തീർക്കാൻ നൈജീരിയക്കാർ താഴേക്കിട്ടു എന്നാണ് വിഷ്ണുവിന്റെ ബന്ധുക്കൾക്ക് ലഭിച്ച വിവരം.

അതേസമയം സൗദിയിൽ ഇന്നലെ കൊല്ലം സ്വദേശിയും കൊല്ലപ്പെട്ടു. കൊല്ലം ഇത്തിക്കര സ്വദേശി സനൽ (35) ആണ് കൊല്ലപ്പെട്ടത്. സൗദി അൽ ഹസയിൽ പാൽ വിതരണ കമ്പനിയിലെ സെയിൽസ്മാനായിരുന്ന സനൽ സഹ ജോലിക്കാരനായ ഘാന സ്വദേശിയുമായുള്ള വാക്കുതർക്കം പിന്നീട് കൊലപാതകത്തിൽ അവസാനിക്കുകയായിരുന്നു.